COVID-19-ի դեմ պայքարելու համար այսօր կառավարությունը որոշում կայացրեց իր պահուստային ֆոնդից 2.3 միլիարդ դրամ հատկացնել առողջապահության նախարարությանը: ԱՆ նախարար Անահիտ Ավանեսյանը կառավարության նիստում ասաց. «Ինչպես տեսնում եք պետությունը ամբողջությամբ հոգում է կորոնավիրուսի վարակով հիվանդ քաղաքացիների բուժման ծախսերը եւ իհարկե, շատ ուրախ կլինեինք, որ այս միջոցներն ուղղվեին այլ կարիքների բավարարմանը, այլ հիվանդությունների բուժմանը, որովհետեւ, եթե մենք բավարար չափով պատվաստման գործընթացն իրականացնենք, պետք է որ նման գումարների ծախսման կարիք չունենանք»:
Տիկին Ավանեսյանն ասաց, որ արդեն 20 բուժկազմակերպություն ընդգրկված են կորոնավիրուսով պացիենտների բուժման գործընթացում: «Ընդհանուր առմամբ 2 հազար 226 մահճակալ այս պահին զբաղված է: Այս պահին առկա ակտիվ դեպքերի մեջ, որը շուրջ 15 հազար է, ընդամենը 176 հոգի ունենք, որոնք պատվաստված լինելով հանդերձ հիվանդանոցային բուժման կարիք ունեն: Սա ցույց է տալիս, որ պատվաստումը կանխում է հիվանդության ծանր ընթացքները եւ առողջապահական համակարգի վրա հոսպիտալացման բեռը չի գոյանում»:
Լուսինե ԲՈՒԴԱՂՅԱՆ
