Իշխող խմբակցության պատգամավոր Հայկ Սարգսյանի կողմից ընդդիմադիր «Հայաստան» խմբակցության պատգամավոր Գեղամ Մանուկյանին ծեծի ենթարկելու գործը կկարճվի: Այս մասին Aravot.am-ի հետ զրույցում ասաց Գեղամ Մանուկյանը: Տեղեկությունը վերջինիս փոխանցել են երեկ՝ ՀՔԾ-ում, երբ հրավիրվել է հարցաքննության:
Հիշեցնենք, օգոստոսի 25-ի ԱԺ նիստում խորհրդարանում կրքերը թեժացան. «Հայաստան» խմբակցության պատգամավոր, պաշտպանության նախկին նախարար Սեյրան Օհանյանը շիշ շպրտեց իշխանական պատգամավոր Հայկ Սարգսյանի ուղղությամբ՝ բանակի մասին նրա ելույթի ընթացքում: Այնուհետեւ խորհրդարանի դահլիճում հերթական քաշքշոցը սկսվեց ընդդիմադիր եւ իշխանական պատգամավորների միջեւ:
Հրապարակված տեսանյութերից մեկու երեւում է, որ «Հայաստան» խմբակցության պատգամավոր Գեղամ Մանուկյանին ծեծի է ենթարկում ՔՊ խմբակցության պատգամավոր Հայկ Սարգսյանը:
Գեղամ Մանուկյան
Գեղամ Մանուկյանը, սակայն, Հայկ Սարգսյանի դեմ ցուցմունք չի տվել: Aravot.am-ի հետ զրույցում նա ասաց, որ այս դեպքն իրեն չի հետաքրքրում իբրեւ մասնավոր դեպք. խնդիրը տեղի ունեցած խուլիգանությունն է, որին ՀՔԾ-ն իրավական գնահատական չտվեց:
Կարդացեք նաև
«Հայրենադավ Նիկոլ Փաշինյանի սադրանքով կազմակերպված զանգվածային խուլիգանության դեպքին ՀՔԾ-ն իրավական գնահատական չի տալիս, քանի որ ՀՔԾ-ն շարունակում է ծառայել մեկ մարդու»,- կարծիք հայտնեց Գեղամ Մանուկյանը:
Նելլի ԳՐԻԳՈՐՅԱՆ
