Ազգային-Ժողովրդավարական Բեւեռն այսօր Նոր Նորքի Հայկ Նահապետի արձանի մոտից իրազեկման երթ է իրականացնում հոկտեմբեր 15-ի հանրահավաքին ընդառաջ։
Երթի սկզբում, ինչպես Բեւեռի ներկայացուցիչներն են ասում, ոստիկանները փորձել են խոչընդոտել երթը, մի քանիսին բերման են ենթարկել, սակայն երթը շարունակվել է։
Բեւեռի ներկայացուցիչ Վահե Գասպարյանն անդրադառնալով ԱԳ նախարար Արարատ Միրզոյանի՝ Իրանում արած հայտարարությանը՝ «Այսպես կոչված, «Զանգեզուրի միջանցքի» մասին որեւէ պայմանավորվածություն չի եղել», ասաց՝ Արարատ Միրզոյանը, Նիկոլ Փաշինյանը, Ալեն Սիմոնյանը պատերազմի ժամանակ ամեն օր ասում էին, որ հաղթում ենք, որ հաղթելու ենք, իսկ դրանից երեք տարի առաջ Նիկոլ Փաշինյանն ասում էր՝ երկրում լինելու է վեթինգ, անցումային արդարադատություն, ոչ մի մուկ, ոչ մի ձուկ չի պլստալու, հիմա ո՞ր մի ասածն եղավ, ո՞ր այս ասածին հավատանք․«Ես հավատում են Իլհամ Ալիեւին, էրդողանին, Պուտինին, որոնք ասում են, որ պետք է բացվեն կոմունիկացիաները, դրա տակ նկատի ունենալով հենց Զանգեզուրի միջանցքը։ Սա հերթական մանիպուլյացիան է»։
Կարդացեք նաև
Վահե Գասպարյանի խոսքով՝ մեր ժողովուրդը պետք է հասկանա, որ այլեւս նրանց հավատալու որեւէ իրավունք չունենք․«Մենք գործ ունենք խամաճիկ իշխանության հետ, որը կատարում է Կրեմլի, Էրդողանի եւ Ալիեւի հրահանգները։ Հիմա դա կկոչվի Զանգեզուրի միջանցք, թե՝ փակուղի կամ մայրուղի, էական չէ։ Էականն այն է, որ նրանք ցամաքով ուզում են կապ ստեղծել Նախիջեւանի եւ Ադրբեջանի միջեւ, ու պարզվոմ է, որ այս երեսուն տարիներին օդային կապը ապահովել են ՀՀ տարածքով, հիմա ուզում են ցամաքով անել։ Այս իշխանությունը սպասարկում է ռուս-թուրքական օրակարգը։ Ժողովուրդն այլեւս իրենց չի հավատում։ Երեքուկես տարվա ընթացքում իշխանությունը սպառել է վստահության պաշարը։ Պետք է օր առաջ ազատվել այս իշխանությունից»։
Լուսանկարները՝ ԱԺԲ-ի Ֆեյսբուքյան էջից:
Նելլի ԲԱԲԱՅԱՆ
