Աշխատանքի եւ սոցիալական հարցերի նախարար Նարեկ Մկրտչյանն այսօր ԱԺ-ում հարցուպատասխանի ժամանակ հայտարարեց, որ նվազագույն կենսաթոշակը, ըստ կառավարության ծրագրի, բարձրանալու է: Մասնավորապես, 2022-ի հունվարի 1-ից բարձրանալու է նվազագույն կենսաթոշակի չափը՝ 26.500 դրամից դառնալով 28.600 դրամ. «Շոշափելի բարձրացումը տեղի է ունեցել 2018-ից հետո, մինչ այդ 18 հազար դրամ էր: Նաեւ մենք բարձրացնելու ենք պարտադիր զինծառայության շարքային կազմի հաշմանդամության զինվորական կենսաթոշակի չափերը՝ առաջին խմբին՝ 40 հազարի փոխարեն տալու ենք 43 հազար, երկրորդ խմբին 30 հազար դրամի փոխարեն՝ 33, երրորդ խմբին՝ 27 հազարի փոխարեն՝ 30 հազար: Նաեւ հաշմանդամություն ունեցող 8300 երեխայի նպաստի չափը կբարձրանա՝ 26.500-ից՝ 37 հազար 500 դրամ»:
«Հայաստան» խմբակցության պատգամավոր Թադեւոս Ավետիսյանն արձագանքեց, որ գնաճն այնքան բարձր է, որ մարդիկ դա չեն զգա:
Հռիփսիմե ՋԵԲԵՋՅԱՆ
