ԱԺ ընդդիմադիր «Հայաստան» խմբակցության պատգամավորներին թույլ չեն տալիս տեսակցել Գորիսի ու Քաջարանի կալանավորված քաղաքապետերին. այս մասին այսօր խորհրդարանում լրագրողների հետ զրույցում ասաց «Հայաստան» խմբակցության պատգամավոր Աննա Գրիգորյանը:
Նա մանրամասնեց, որ վերջին անգամ տեսակցելու հնարավորություն են ունեցել Մխիթար Զաքարյանին ու Արթուր Սարգսյանին: Առուշ Առուշանյանի ու Մանվել Փարամազյանի համար տեսակցություններն արգելված են: Աննա Գրիգորյանը դժվարացավ մեկնաբանել, թե ինչո՞ւ են նրանց համար արգելված տեսակցությունները. «Փաստ է, որ մենք երկար ժամանակ չենք կարողացել տեսնել նրանց»:
Անդրադառնալով Գորիսի քաղաքապետի ընտրություններին Առուշ Առուշանյանի մասնակցությանը, Աննա Գրիգորյանը հույս հայտնեց, որ գորիսեցիները ճիշտ ընտրություն կկատարեն։
Ընդդիմադիր պատգամավորը կասկածից վեր է համարում այն, որ Առուշ Առուշանյանի նկատմամբ քաղաքական հետապնդում է իրականացվում. «Այո, դա հստակ քաղաքական հետապնդում է, նա այս պահին կալանքի տակ է, որովհետև Քարահունջի գյուղապետը մի քանի փոփոխվող ցուցմունք է գրում ու վերջին ցուցմունքը գրելուց հետո կալանավորում են Առուշանյանին, բաց են թողնում տվյալ համայնքի ղեկավար Լուսինե Ավետյանին։ Այստեղ հստակ կապը կա»:
Կարդացեք նաև
Այլ մանրամասները՝ տեսանյութում
Նելլի ԳՐԻԳՈՐՅԱՆ
