Երևան, 6 հոկտեմբերի 2021թ․ – Այսօր, տկն․ Նատիա Նացվլիշվիլին, որպես Հայաստանում ՄԱԿ-ի Զարգացման ծրագրի (ՄԱԶԾ) մշտական ներկայացուցիչ, իր հավատարմագրերը հանձնեց ԱԳՆ ՀՀ արտաքին գործերի նախարար պրն․ Արարատ Միրզոյանին։
Տկն․ Նացվլիշվիլին Հայաստանում ՄԱԶԾ մշտական ներկայացուցչի պարտականությունները ստանձնել էր 2021թ․ սեպտեմբերի 22-ին։
«Հայաստանում աշխատելն ինձ համար իրապես պատիվ և արտոնություն է: ՄԱԶԾ-ն ամուր գործընկերային հարաբերություններ ունի ՀՀ կառավարության և հայ ժողովրդի հետ: Ինչպես և անցած 28 տարիների ընթացքում, մենք այստեղ ենք՝ աջակցելու մարդկանց, առաջին հերթին ամենախոցելիներին, ինչպիսիք են կանայք և երիտասարդները, գործազուրկները, գյուղական և քաղաքային աղքատները, տարեցներն ու հաշմանդամները»,- ասում է նորանշանակ ՄԱԶԾ մշտական ներկայացուցիչը:
Մինչև Հայաստան ժամանելը, տկն․ Նացվլիշվիլին եղել է ՄԱԶԾ մշտական ներկայացուցչի ժամանակավոր պաշտոնակատարը ՄԱԶԾ Թուրքմենստանի գրասենյակում։ Նա ամրապնդել է ՄԱԶԾ-ի դիրքը, որպես կառավարության և զարգացման այլ գործակալությունների համար նախընտրելի գործընկեր, ինչպես նաև նպաստել է գրասենյակի պորտֆելի կրկնապատկմանը՝ ինչպես ծավալի, այնպես էլ բազմազանության առումով։
Կարդացեք նաև
Մինչ այդ Նատիա Նացվլիշվիլին աշխատել է ՄԱԶԾ Վրաստանի գրասենյակում որպես մշտական ներկայացուցչի օգնական, ծրագրերի ղեկավար, ինչպես նաև կառավարման թիմի ղեկավար (2017-2018թթ․)։
Նախքան ՄԱԶԾ-ին միանալը, տկն․ Նատիա Նացվլիշվիլին աշխատել է որպես տնտեսագետ Արժույթի միջազգային հիմնադրամի Թբիլիսիի գրասենյակում, ԵԱՀԿ Վրաստանի առաքելությունում և Վրաստանի ազգային բանկում։ Նա ունի հարուստ ակադեմիական փորձ՝ 2002-2010թթ․ դասավանդել է Վրաստանի տարբեր առաջատար համալսարաններում:
Տկն․ Նատիա Նացվլիշվիլին ավարտել է Հարվարդի համալսարանի Քենեդու անվան կառավարման դպրոցը հանրային քաղաքականության մագիստրոսի կոչմամբ (2002թ․), ինչպես նաև Թբիլիսիի պետական համալսարանի ֆիզիկայի և մաթեմատիկայի ֆակուլտետը՝ մագիստրոսի կոչմամբ (2000թ․)։
ՄԱԿ-Ի ԶԱՐԳԱՑՄԱՆ ԾՐԱԳՐԻ ՆԵՐԿԱՅԱՑՈՒՑՉՈՒԹՅՈՒՆ ՀԱՅԱՍՏԱՆՈՒՄ (UNDP)
