«Հարկային օրենսգրքում» փոփոխություններ եւ լրացումներ կատարելու մասին նախագիծն է քննարկվում ԱԺ-ում: ՊԵԿ նախագահ Ռուստամ Բադասյանը, ներկայացնելով այն, ասաց, որ նախագծով ներդրվում է էլեկտրոնային ծառայությունների հարկումը, որոնք իրականացնում են ֆիզիկական անձինք, ոչ ռեզիդենտ կազմակերպությունները: Օրինակ, տեղեկատվական եւ հեռահաղորդակցական ցանցի ծառայությունների մատուցումը ինտերնետով հարկվելու է: Խոսքը ինտերնետով ապրանքների գնման ծառայությունների մասին չէ:
Բադասյանը թվարկեց, թե որ ծառայություններն են հարկվելու. «Այդպիսի ծառայություններն են ինտերնետով գովազդային ծառայությունների մատուցումը, գովազդային հարթակների տրամադրումը, կրթության ոլորտի ծառայությունների մատուցումը տեղեկատվական հեռահաղորդակցման կապով, այդ թվում՝ ինտերնետով, ինտերնետով ապրանքների, աշխատանքների, ծառայությունների ձեռքբերման առաջարկությունների տեղադրման մասով, ֆիլմեր դիտելու համար նախատեսված ծառայությունները, օրինակ, Netflix-ում, ֆեյսբուքով ֆիզիկական անձանց համար գովազդ տեղադրելը եւ այլն: Հաշվարկվելու է ԱԱՀ-ի վճար»:
ՔՊ պատգամավոր Գեւորգ Պապոյանը հարցրեց, թե որքա՞ն գումարի մուտք կլինի այս օրենքի արդյունքում Բադասյանը պատասխանեց, որ բյուջեի համար բավականին նշանակալի գումարի մասին է խոսքը, բայց կոնկրետ թիվ չի կարող հնչեցնել:
Հռիփսիմե ՋԵԲԵՋՅԱՆ
