«Պատերազմ ու պարտություն բերածները երբեք չեն կարող խաղաղություն հաստատել: Սա քաղաքագիտական կանոն է: Եթե մեր ժողովրդի մեծ մասը սա չհասկանա, ապա Արցախի պետականության կորստին, ցավոք, կհաջորդի Հայաստանի պետականության կորուստը, ինչը չի կարելի թույլ տալ»,- ԱԺ-ում ասաց «Հայաստան» խմբակցության պատգամավոր Անդրանիկ Թեւանյանը:
Արտահերթ ելույթով հանդես եկավ ԱԺ փոխխոսնակ Ռուբեն Ռուբինյանը՝ արձագանքելով. «Պարո՛ն Թեւանյան, ո՞նց էր ասում ձեր առաջնորդը՝ եթե ես թուրքական գործակալ լինեի, այսպես կանեի: Եթե ես ադրբեջանական գործակալ լինեի, Ազգային ժողովից կունենայի այն ելույթը, որը հենց նոր ունեցաք, որովհետեւ մեկին մեկ կրկնեցիք այն թեզերը, որոնք Ադրբեջանի ղեկավարությունը հնչեցնում է պատերազմի վերաբերյալ: Մասնավորապես, ըստ ադրբեջանական կողմի եւ ըստ ձեզ, պատերազմը հրահրել է Հայաստանը, ապակառուցողական հայտարարություններ արել է Հայաստանը,, չգիտեմ, դուք այդքան հեռու կգնաք, թե չէ, բայց իրենք նաեւ ասում են՝ հարձակվել է Հայաստանը: Հուսով եմ այդ տիպի աբսուրդի ականատես չենք լինի, չնայած ես սկսել եմ նաեւ հավատալ, որ դրան ականատես կլինենք: Ի հեճուկս Ադրբեջանի ղեկավարության եւ ի հեճուկս ձեզ, այն թեզը, որ Հայաստանն է հրահրել պատերազմը, չի գտնելու որեւէ աջակցություն ո՛չ Հայաստանում, ո՛չ աշխարհում: Ագրեսորը Ադրբեջանն է եւ ես հույս ունեմ, որ Իլհամ Ալիեւը եւ դուք դա կհասկանաք եւ կընդունեք»:
Հռիփսիմե ՋԵԲԵՋՅԱՆ
