Ինչպես տեղեկացրել ենք, ԱԺ-ում բանավեճ էր վարչապետ Նիկոլ Փաշինյանի խոսքերի հետ կապված, որը ադրբեջանական սահմանների մասին խոսելիս հղում էր արել 2010-ին ընդունված փոփոխություններով ՀՀ Վարչատարածքային բաժանման մասին օրենքին:
Բանավեճը սկսվեց, երբ Տարածքային կառավարման եւ ենթակառուցվածքների փոխնախարար Վաչե Տերտերյանը հերքեց վարչապետին: ՔՊ-ական Գեւորգ Պապոյանը հիշեցրեց, թե ինչպես էր Սերժ Սարգսյանն ասում՝ Աղդամը մեր հայրենիքը չէ:
«Պատիվ ունեմ» խմբակցությունից Հայկ Մամիջանյանն իր ելույթում ասաց. «Մի կողմ թողնենք, թե ինչ էր գրված այդ օրենքում, մեր իշխանությունների ժամանակ սուրբ Ղազանչեցոցը Ղազանչի չէր, Շուշին Շուշա չէր, գտնվում էր մեր զինվորների պաշտպանության տակ: Մեր իշխանության օրոք մարդիկ Սյունիքում անվտանգ երթեւեկում էին, Ալիեւն էլ բողոքում էր, որ փակ դռների հետեւում իրեն ստիպում էին ճանաչել Արցախի անկախությունը: Երկրի ղեկավարը, պառլամենտի, գործադիրի ղեկավարը անարգել այցելում էին Արցախ, այլ ոչ թե վախենում էին ինչ-որ մեկից, որ հանկարծ ինչ-որ մեկը չջղայնանա, որ Արցախի տոնին Արցախում ենք»:
Արձագանքելով Սերժ Սարգսյանի խոսքերի հիշեցմանը, որ Աղդամը մեր հայրենիքը չէ, Մամիջանյանն ասաց. «Ձեր գործընկեր պատգամավորներն ասում են՝ իսկ ո՞վ ասաց, որ Շուշին ու Հադրութը պիտի հետ բերենք, ո՞վ ասաց, որ պետք է ՄԱԿ-ում խոսենք Շուշիի ու Հադրութի օկուպացիայի մասին: Որ այդպես սիրում եք մեր օրենքները մեջբերել, մենք ժամանակին օրենքներ ենք ընդունել, որ ՀՀ վարչապետը ընդունում է որոշումներ՝ ի շահ Հայաստանի ու որոշ դեպքերում ոչ ադեկվատ դրսեւորումներ չի ունենում, այդ օրենքն էլ պահպանեք»:
Կարդացեք նաև
ՔՊ խմբակցության պատգամավոր Վլադիմիր Վարդանյանը նախ նիստը վարող ԱԺ փոխնախագահ Ռուբեն Ռուբինյանին հորդորեց կոշտ լինել՝ օրակարգից շեղելու ընդդիմության քայլերի նկատմամբ. «Իհարկե, սահմանները ներպետական օրենսդրությամբ չեն անցկացվում, հասկանալի է, բայց այն քննարկումը, որ դուք այստեղ ծավալում եք, շատ ավելի վտանգավոր է… Խոսում են նրա մասին, թե Արցախ գնում էինք, չէինք գնում, մի հատ հարց եմ ուզում տալ՝ Արցախի Անկախության տոնին ո՞ւր էիք, պարոն Մամիջանյան, ինչի՞ մեր հետ Արցախում չէիք: Կամ երկրորդ հարցը՝ երբ որ ԵԽԽՎ-ում քննարկվում էր կարեւորագույն նախագիծ, երբ որ պետք էր վերականգնել Արցախ անվանումը, Լեռնային Ղարաբաղ անվանումը, ո՞ւր էիք, ինչո՞ւ մեր կողքին չէիք: Ինչի՞ մեր հետ չէիք մեկնել Ստրասբուրգ ու պատգամավոր առ պատգամավոր չէիք համոզում, որ չափազանց կարեւոր է, կենսական նշանակության հարց է»:
Հռիփսիմե ՋԵԲԵՋՅԱՆ
