Այսօր ԱԺ նիստի մեկնարկին ընդդիմությունը դժգոհեց, որ ԱԺ նախագահ Ալեն Սիմոնյանն ու ՔՊ խմբակցության ղեկավար Հայկ Կոնջորյանը խոստացել են փակ հանդիպում կազմակերպել Սյունիքի սահմանի, ադրբեջանական ոստիկանական կետերի տեղադրման հետ կապված հարցերը քննարկելու, բայց մինչ օրս չեն արել դա:
«Հայաստան» խմբակցության քարտուղար Արծվիկ Մինասյանն ասաց, որ իշխանությունը միշտ հորդորում է, որ նման հարցեր ոչ թե բաց նիստերի ժամանակ քննարկեն, այլ ուրիշ ձեւաչափով, որպեսզի թշնամին չիմանա «Մենք սա ենք ուզում, ոչ թե հրապարակային շոուի տարրեր պարունակող գործողություններ: Այն, ինչ կատարվում է Սյունիքում, տարբեր դերակատարում ունեցողների հայտարարությունների առումով, ուղիղ սպառնալիք է մեր անվտանգությանը»:
ԱԺ փոխնախագահ Ռուբեն Ռուբինյանը հորդորեց հարցադրում անելու գործիքից օգտվել, Արծվիկ Մինասյանը հակադարձեց. «Լավ, ենթադրենք հարցադրում տվեցինք, հետո, ինչպես հաճախ պատահում է, Նիկոլ Փաշինյանը տարբեր ամբիոններից սկսում է մեղադրանքներ հնչեցնել անհիմն, մերկապարանոց, հելնենք մե՞նք էլ պատասխաններ տանք: Դա աշխատելաոճ չի, եթե այդ ոճն եք որդեգրում, մենք էլ կարող ենք ավելի ոչ համարժեք ոճ որդեգրենք»:
«Հայաստան» խմբակցության պատգամավոր Աննա Գրիգորյանը զարմացած էր, որ նման մարտահրավերներ ունեցող երկրում Ազգային ժողովի օրակարգում «Հարկային օրենսգրքի փոփոխություններ ու «Պետտուրքի մասին» օրենքում փոփոխությունների հարցն է. «Վստահաբար, սրանք չեն մեր թիվ մեկ օրակարգային խնդիրները: Սյունիքում իրավիճակը որեւէ դրական առաջընթաց չի ունեցել նախորդ նստաշրջանից հետո: Ընդհակառակը, այսօր ադրբեջանցիները լայնածավալ շինարարական աշխատանքներ են իրականացնում, ի՞նչ են կառուցում այնտեղ, որեւէ մեկը պատկերացում ունի՞ ինչ են կառուցում ու ի՞նչ նոր վտանգ կարող է դա ստեղծել մեր հայրենակիցների համար»:
Կարդացեք նաև
Աննա Գրիգորյանը հիշեցրեց, որ երբ ադրբեջանական մաքսակետերի մասին ահազանգում էին, նորից անտարբեր էր իշխանություն, դրանից հետո նույնիսկ քաղաքացիներ առեւանգեցին այդ ճանապարհից. «Մենք դիմել ենք ՊՆ-ին, ԱԱԾ-ին, տարածքային կառավարման նախարարություն, ոստիկանություն, որ պարզաբանեն՝ ինչպե՞ս պետք է նշված ճանապարհահատվածում երթեւեկություն կազմակերպվի: Բոլոր այս գերատեսչությունները նույն պատասխանն են տվել՝ ասելով, որ մեր լիազորություններից դուրս է: Ո՞վ է պատասխանատվություն կրում մեր քաղաքացիների անվտանգության համար, կա՞ գերատեսչություն: Ցավալիորեն, մարդիկ, որոնք 3 տարի առաջ ասում էին մենք ենք տերը մեր երկրի, այսօր ոչ երկրին են տեր, ոչ ժողովրդին»:
Հռիփսիմե ՋԵԲԵՋՅԱՆ
