Դիլիջանի արվեստի պետական քոլեջում «Ապագա Հայկականը» նախաձեռնության անդամները Ռուբեն Վարդանյանի գլխավորությամբ հանդիպել են քաղաքի բնակիչների հետ և ներկայացրել են իրենց նախաձեռնությունն ու պատասխանել ներկաների հարցերին:
Ռուբեն Վարդանյանը իր ելույթում նշել է, որ այս հանդիպումը իրենց թափանցիկ լինելու խոստումն է և նպատակ ունեն Դիլիջան համայնքի բնակիչների հետ զրուցել իրենց տեսլականի և ապագա ծրագրերի մասին:
«2020 թվականի դեկտեմբերին մենք հանդիպեցինք վարչապետի հետ, քննարկեցինք երկրում տիրող իրավիճակը և հասկացանք, որ մի բան կա, որ դուրս է մնում ուշադրությունից՝ սոցիալական խնդիրն է, որը շատ լուրջ քննարկումներ և համազգային միացում է պահանջում: Հենց այդ պատճառով մենք ապրիլին հայտարարեցինք նախաձեռնության մասին և ստեղծվեցին 15 ուղղությունները: Այս նախաձեռնությունը կուսակցություն չէ, չնայած, որ մենք բաց ենք բոլոր այն ուժերի առաջ, որոնք ցանկանում են համագործակցել: Մենք պատրաստ ենք համագործակցել իշխանության և ընդդիմության հետ, քանի որ մենք վստահ ենք, որ միակ ճանապարհը այս ճգնաժամից դուրս գալու՝ համախմբվածությունն է»,֊ իր ելույթում նշել է «Ապագա Հայկականը» նախաձեռնության հիմնադիր Ռուբեն Վարդանյանը:
Կարդացեք նաև
Հանդիպմանը ներկա քաղաքացիներից մեկը, որը Դիլիջանի Մաքսիմ Գորկի թաղամասի բնակիչ է, ամբողջ թաղամասի անունից իր մտահոգությունը հայտնեց՝ տեղեկացնելով, որ իրենց թաղամասում Կենտրոնական բանկի մասնաճյուղի կառուցումից հետո վնասված խողովակների պատճառով՝ արդեն 2 տարի է զրկված են ջրից․
«Շատ տեղեր ենք դիմել՝ ընդհուպ մինչև Նիկոլ Փաշինյանին, սակայն հարցը չի լուծվել: Մեզ հետաքրքիր է, եթե ինչ-որ պաշտոնայի ջուրը մի քանի օրով կտրենք, ինչպե՞ս են ապրելու, իսկ մենք արդեն 2 տարի է՝ ջուր չունենք: Երբ մենք դիմել ենք՝ ասել են, որ բնակիչները պետք է 15 միլիոն դրամ գումար տան, որ այդ հարցը լուծվի»:
Մտահոգ քաղաքացու հարցին ի պատասխան Ռուբեն Վարդանյանը նշեց, որ խնդիրը հեշտ լուծում չունի և միայն օրինական քաղաք ունենալու դեպքում կարելի է նման խնդիրներին լուծում տալ․
«Խնդիրը նրանում է, որ տեր է պետք, ով պատասխանատվություն է կրում այս ամենի համար, ով կտա հարցի լուծման բանաձևերը: Ես վստահ եմ, որ Դիլիջանի զարգացման ծրագիր պետք է լինի, որով Դիլիջանի ջրի և կոյուղիների խնդրի ընդհանուր հարցը կկարգավորվի: Դրան հեշտ լուծում չկա և այն լուրջ ներդրումների հարց է: Շատ կարևոր է հասկանալ, թե ինչպես ենք Դիլիջանը դարձնում օրինական, որ խնդիրները լուծվեն արդեն պրոֆեսիոնալ ձևով, ոչ թե պոպուլիստական»։
Վարդանյանի խոսքով Դիլիջանը հրաշալի օրինակ է մյուսների համար և շատերը տեսնում են այս քաղաքի աճը, որը պետք է զարգացնեն Դիլիջանի բնակիչները իրենց ձեռքերով․
«Մենք պետք է հասկանանք, որ մենք ենք տերը մեր ապագայի, և մենք պետք է մեզ փոխենք ու մեր երկիրը դարձնենք ամենասքանչելի վայրը»:
Սաթենիկ ՀՈՎՍԵՓՅԱՆ
