Ադրբեջանի արտգործնախարար Լեյլա Աբդուլլաևան արձագանքել է Իրանի արտգործնախարարին՝ հայտարարելով, որ անհիմն են Թեհրանի պնդումները իրանա-ադրբեջանական սահմանին որևէ երրորդ ուժի առկայության վերաբերյալ:
Հիշեցնենք, շաբաթ օրը Իրանի արտգործնախարար Հոսեյն Ամիր Աբդուլլահիյանը, մեկնաբանելով Ադրբեջանի հետ սահմանին իրենց զորավարժությունները՝ ասել էր, որ Թեհրանը երբեք չի հանդուրժի «կեղծ սիոնիստական ռեժիմի ներկայությունը և նրա սադրիչ գործողությունները» Իրանի սահմանին, ինչպես նաև տարածաշրջանում աշխարհաքաղաքական փոփոխությունները:
«Մենք չենք ընդունում իրանա-ադրբեջանական սահմանին որևէ երրորդ ուժի առկայության մասին պնդումները, քանի որ այդ պնդումները որևէ հիմք չունեն: Ընդհանուր առմամբ, Ադրբեջանի տարածքում որևէ ուժի, այդ թվում՝ ահաբեկչական տարրերի առկայությունը, որոնք կարող էին սպառնալիք լինել մեր պետությանը կամ հարևան երկրներին, չի կարող քննարկման առարկա լինել»,- ասվում է Ադրբեջանի ԱԳՆ մեկնաբանության մեջ:
Աբդուլլաևայի խոսքով՝ Ադրբեջանի հասցեին այդպիսի պնդումները անհիմն են և ադրբեջանական կողմին որևէ ապացույց չի ներկայացվել: Նա ընդգծել է, որ Ադրբեջանը միշտ առաջնորդվել է միջազգայնորեն ճանաչված սահմանների անխախտելիությամբ: «Ադրբեջանը տասնամյակներ շարունակ տառապել է իր տարածքի մի մասի օկուպացիայից և միջազգային սահմանների խախտումից: Մասնավորապես, Իրանին սահմանակից մեր ավելի 130 կմ տարածք գտնվել է Հայաստանի օկուպացիայի տակ: Ցավոք, տարիներ շարունակ, մենք բարեկամական իրանական պետությունից այդքան կտրուկ քննադատություն մեր սահմանների մի մասի օկուպացիայի մասին չենք լսել»,- ասել է Աբդուլլաևան:
Կարդացեք նաև
Նա ընդգծել է, որ Ադրբեջանը սատարում է սահմանված հարաբերությունները բոլոր երկրների հետ՝ հիմնված միջազգային սահմանների նկատմամբ փոխադարձ հարգանքի վրա: «Ինչ վերաբերում է Ադրբեջանում օտարերկրյա միջամտության մասին կարծիքին, մենք կցանկանայինք ընդգծել, որ Ադրբեջանի Հանրապետությունը միշտ վարել է անկախ արտաքին քաղաքականություն՝ հիմնված ազգային շահերի վրա, և վերջին 30 տարվա մեջ բազմիցս դա ապացուցել է կոնկրետ քայլերով: Բարեկամական և բարիդրացիական հարաբերությունների զարգացումը հարևան երկրների հետ մեր արտաքին քաղաքականության առաջնահերթություններից մեկն է, և մենք մշտական քայլեր ենք ձեռնարկում այդ ուղղությամբ»,- ասել է նա:
Պատրաստեց Վիկտորյա ԱՆԴՐԵԱՍՅԱՆԸ
