«Այս մեկ տարվա ընթացքում եղել են տարբեր ակնարկներ՝ պատերազմում պատասխանատվության և մեղավորության մասին։ Իհարկե, փորձելու են ամբողջ մեղքը բարդել մեր բանակի և գեներալների վրա», – այսօր այս մասին հրավիրված մամուլի ասուլիսի ժամանակ հայտարարեց ՀՀ երկրորդ նախագահ Ռոբերտ Քոչարյանը՝ խոստովանելով, որ սա այն դեպքը չէ, որ ինքը ոգևորված է պատերազմի ժամանակ բանակի գործողություններով, բայց այս պատերազմում բանակին մենակ են թողել։
Հիշեցնենք, անորակ զենք-զինամթերք ձեռք բերելու եւ պետությանն առանձնակի խոշոր չափերի վնաս պատճառելու կասկածանքով օրերս կալանավորվեցին պաշտպանության նախկին նախարար Դավիթ Տոնոյանը, նրա նախկին խորհրդական Դավիթ Գալստյանը, որը չորս քրեական գործերով է անցնում, ԳՇ պետի տեղակալ Ստեփան Գալստյանը: Խոսքը մոտ երեք միլիարդ դրամի մասին է:
«Հիմա պետք է հասկանալ, թե այդ ֆունդամենտալ սխալ որոշումներն ում կողմից են կայացվել։ Եթե նախաձեռնությունը եղել է գեներալներինը՝ այլ բան է, եթե կառավարության կամ վարչապետինը՝ մեկ ուրիշ հարց է։ Իսկ այժմ միայն փորձ է արվում ստեղծել ֆոն, որ պատերազմի այսպիսի արդյունքը կոռումպացված, թալանչի գեներալների մեղքն է»,- ասաց նա։
Կարդացեք նաև
Երկրորդ նախագահը իշխանություններին խորհուրդ տվեց գեներալների կոռումպացված լինելու մասին մտածել այն ժամանակ, երբ հերոսների կոչումներով և շքանշաններով պարգևատրում են վերջիններին։
«Գեներալների վրա մեղքը բարդելու փորձ արվում է և արվելու է, պարզապես պետք է, որ գեներալները սկսեն խոսել և ճշմարտությունը պատմել»,- ամփոփեց Քոչարյանը։
Նելլի ԳՐԻԳՈՐՅԱՆ
