Փրփրուն գինիների հիմքով այս կոկտեյլները շատ նման եղանակով են պատրաստվում: Երկուսն էլ համարվում են «ցերեկային», «բրանչի» կոկտեյլներ, մատուցվում են տոնական սեղաններին, հարսանիքների, բացօթյա ֆուրշեթների ժամանակ: «Բելինին» օրիգինալ տարբերակում պատրաստվում է իտալական փրփրուն գինու՝ պրոսեկոյի հիմքով, իսկ «Միմոզան» ֆրանսիական շամպայնի: Սակայն երկու դեպքում էլ կարելի է վերցնել ցանկացած չոր փրփրուն գինի՝ ֆրանսիական շամպայն, իտալական պրոսեկո, իսպանական կավա, կամ որեւէ այլ փրփրուն գինի: Ես պատրաստում եմ հայկական չոր փրփրուն գինիով, շատ համեղ է ստացվում:
Անհրաժեշտ մթերքները
Բելինիի համար՝
1 շիշ փրփրուն գինի
Կարդացեք նաև
3 խոշոր սպիտակ դեղձ
5-6 հատիկ ելակ կամ ազնվամորի
կամ
կես կիտրոնի հյութ եւ 3 ճաշի գդալ շաքարավազ
Միմոզայի համար
1 շիշ փրփրուն գինի
750 մլ թարմ քամած նարնջի հյութ (եթե թարմ քամած չունեք, ինչ արած, կարող եք վերցնել նարնջի պատրաստի հյութ)
Պատրաստման եղանակը
Միմոզան պատրաստելը շատ հեշտ է: Շամպայնի երկար եւ նեղ բաժակի մեջ լցնում եք նարնջի հյութ՝ ուղիղ կեսով չափ, եւ մնացած կեսն ավելացնում եք շատ սառը շամպայնը:
Բելլինին պատրաստելու համար նախ պետք է պատրաստել դեղձի պյուրե: Ըստ օրիգինալ բաղադրատոմսի՝ պետք է վերցնել միայն սպիտակ դեղձ: Ինչպես նաեւ՝ մի քանի հատիկ ելակ կամ ազնվամորի՝ նուրբ վարդագույն պյուրե ստանալու համար: Սակայն հիմա շատ հաճախ վերցնում են դեղին, բայց՝ ջրալի դեղձ, եւ հետն ավելացնում կիտրոնի հյութ ու շաքարավազ: Այս դեպքում կոկտեյլը ոչ թե նուրբ վարդագույն, այլ ավելի դեղնավուն երանգ է ունենում:
Հարկավոր է լավ հասած դեղձը լավ լվանալ, կեղեւահան անել, մանր կտրատել եւ լցնել կոտորակիչի՝ բլենդերի մեջ, ավելացնելով կամ հատապտուղը կամ կիտրոնի հյութն ու շաքարավազը: Երկու դեպքում էլ հարկավոր է ավելացնել 2-3 ճաշի գդալ ջուր, որպեսզի դեղձը կարողանա պյուրե դառնալ:
Երբ պյուրեն պատրաստ լինի, շամպայնի կամ սպիտակ գինու երկարավուն բաժակի մեջ լցնում եք մի քանի գդալ պյուրե, եւ ավելացնում շատ սառը փրփրուն գինին: Կարող եք բաժակը զարդարել դեղձի կտորով:
Մանրամասները՝ տեսանյութում
