«Այսօր մարտահրավերներն ահռելի են եւ աննախադեպ։ Պատմության ընթացքում երբեւէ կանգնած չենք եղել ամբողջությամբ ոչնչանալու սպառնալիքի առաջ։ Պատճառը ռեժիմն է, որը պաշտպանում է եւ առաջ մղում թշնամու օրակարգը»,-Ազատության հրապարակում հանրահավաքի ժամանակ այսօր հայտարարեց «Ազգային ժողովրդավարական բեւեռի» խորհրդի անդամ, քաղաքագետ Հայկ Մարտիրոսյանը։
Նրա խոսքով՝ Նիկոլ Փաշինյանը շուտով ստորագրելու է այսպես կոչված «խաղաղության պայմանագիրը» եւ հարակից այլ փաստաթղթեր․ «Այդ պայմանագիրը բերելու է ցեղասպանություն, ոչնչացում։ Այն չպետք է ստորագրվի։ Մենք դա թույլ չենք տալու։ Թուրքիայի նախագահին «դրական ազդակներ» են ուղղվում եւ ստացվում։ Դրանք երկու թրքական ռեժիմների «դրական ազդակներն» են, որոնք ՀՀ-ի համար մահ են ազդարարում։ Դրանք չպետք է իրականանան»։
Լուիզա ՍՈՒՔԻԱՍՅԱՆ
