Ֆինլանդիայում շարունակվում է ծանրամարտի Եվրոպայի երիտասարդական առաջնությունը:
Հայաստանի ներկայացուցիչ Կարեն Ավագյանը բոլոր ոսկե մեդալները նվաճեց 89 կգ քաշային կարգում: Պոկում վարժությունում 165 կգ ծանրաձողը բարձրացնելուց հետո թեեւ նա երկու անգամ ձախողվեց 170 կգ-ում, սակայն այդ արդյունքն էլ բավական էր փոքր ոսկին նվաճելու համար: Հրում վարժությունում հայ ծանրորդը բարձրացրեց նախ 193, ապա նաեւ 195 կգ ծանրաձողերը, որից հետո երրորդ մոտեցման անհրաժեշտություն այլեւս չեղավ: Այս վարժությունում էլ հավասարը չունենալով՝ Կարեն Ավագյանը երկամարտի 360 կիլոգրամով հերթական չեմպիոնական տիտղոսը բերեց Հայաստանին:
Աշոտ ՀԱԿՈԲՅԱՆ
