Այսօր ԱԺ աշխատանքի եւ սոցիալական հարցերի հանձնաժողովի արտահերթ նիստում քննարկվեց «Պետական պաշտոններ եւ պետական ծառայության պաշտոններ զբաղեցնող անձանց վարձատրության մասին» օրենքում փոփոխություն եւ լրացում կատարելու նախագիծը: Այս նախագծով սոցփաթեթից օգտվողները կարող են նաեւ այլ ծառայություններից օգտվել, մասնավորապես, այցելել մարզաառողջապահական եւ սպորտային համալիրներ, լողավազաններ:
Թադեւոս Ավետիսյան
«Հայաստան» խմբակցության պատգամավոր Թադեւոս Ավետիսյանն առաջարկեց սոցփաթեթի գումարը՝ 72 հազար դրամը կրկնապատկել, շահառուների թիվը մեծացնել՝ ընդգրկելով նաեւ ՀԿ-ների աշխատողներին եւ բացի այդ, նախագծով կարգավորել նաեւ պաշտոնյաների պարգեւավճարի հարցը: Հանձնաժողովի նախագահ Հերիքնազ Տիգրանյանն ասաց, որ նախագծի նպատակից կշեղվեն ու կհեռանան:
Ռուբեն Սարգսյան
Ինչ վերաբերում է 72 հազար դրամի կրկնապատկմանը, փոխնախարար Ռուբեն Սարգսյանը հարցրեց, թե որտեղի՞ց վերցնեն այդ գումարը, ո՞ր ոլորտից կրճատեն: Թադեւոս Ավետիսյանը պատասխանեց, որ մի տեղ գիտի. «Դա բարձրաստիճան պետական պաշտոնյաների ֆոնդն է, միանգամից կարելի է դա վերցնել ու ուղիղ տանել դեպի սոցփաթեթի շահառուների ֆոնդ»:
Հերիքնազ Տիգրանյան
Հերիքնազ Տիգրանյանը նկատեց, որ «բարձրաստիճան պետական պաշտոնյայի» սահմանումը չունեն, ովքե՞ր են մտնում դրա մեջ: Ավետիսյանը մանրամասնեց. «Կարելի է սահմանումը տալ, օրինակ՝ վարչապետ, փոխվարչապետ, նախարար, փոխնախարար, պատգամավոր, տարբեր մարմինների ղեկավարներ, քաղաքական պաշտոններ: Սա՝ մեկ աղբյուր: Վստահաբար կան էլի աղբյուրներ: Համաձայն «Պետբյուջեի մասին» նախագծի, եկամուտները 30% աճելու են: Կան այդ հնարավորությունները, խնդիրը փողը չի, այլ մոտեցումն է: 72 հազար դրամը կարող է առնվազն դառնալ 140 հազար դրամ, 66 հազար 140 դրամ բազային աշխատավարձն էլ ավելացնել: Սա շատ կարեւոր է: Հացի սեղանին երբ որ հացն է պակասում, մեծ հաշվով եթե սեւ իկրա էլ դնեն՝ բան չի փոխի»:
Կարդացեք նաև
Հերիքնազ Տիգրանյանն ասաց, որ բազային աշխատավարձը փոխելու պարագայում ամբողջ պետական ապարատի աշխատավարձի գործակցի սանդղակներն են փոխվում: Թադեւոս Ավետիսյանի առաջարկները դրվեցին քվեարկության եւ մերժվեցին:
Նա հայտարարեց, որ կառավարության նախագծին ինքը ձեռնպահ կքվեարկի, քանի որ իր առաջարկները չընդունեցին: Կառավարության նախագիծը դրական եզրակացություն ստացավ:
Հռիփսիմե ՋԵԲԵՋՅԱՆ
