Թուրքիոյ Հայ կաթողիկէ հասարակութեան վիճակաւոր Լեւոն արք. Զեքիեան շաբաթասկիզբին Անգարայի մէջ ընդունուեցաւ Վաքըֆներու ընդհանուր տնօրէն Պուրհան Էրսոյի կողմէ, կը հաղորդէ պոլսահայ «Ժամանակ»։
Հանդիպման ընթացքին յատուկ ուշադրութեան առարկայ դարձաւ Տիգրանակերտի Հայ Կաթողիկէ եկեղեցւոյ կացութիւնը։ Եկեղեցին մեծապէս վնասուած էր պատմական Սուր թաղամասին մէջ տեղի ունեցած զինեալ բախումներու ընթացքին ու վերանորոգուած՝ պետութեան հովանաւորութեամբ։ Լեւոն արք. Զեքիեան մատնանշեց, որ շրջանին մէջ հայ կաթողիկէ հասարակութիւնը բոլորովին նօսր վիճակի մը մէջ է, ինչ որ պատճառ կը դառնայ այդ սրբավայրին մէջ հերթականօրէն պաշտամունք կատարելու գործնական դժուարութիւններու։ Ան յայտնեց, որ եկեղեցւոյ կառոյցը կարելի է օգտագործել մշակութային, կրթական, գիտական եւ ուսումնական ձեռնարկներու համար՝ պահպանելով անոր ճարտարապետական դիմագիծը եւ բոլորովին յարիր ձեւով անոր սրբավայրի բնոյթին։ Նոյն ժամանակ, ան փոխանցեց իր եւ Թուրքիոյ Հայ կաթողիկէ հասարակութեան կամքը, որպէսզի երբ փափաքին՝ կարենան, կանխաւ իմացնելով, անխափան պաշտամունք կատարել եկեղեցւոյ մէջ։
Վաքըֆներու ընդհանուր տնօրէնութեան խորհուրդի նիստը որոշեց եկեղեցւոյ պահպանութիւնը, ապահովութիւնը եւ հոգատարութիւնը յանձնել Տիճլէի համալսարանին՝ երաշխաւորելու պայմանով կառոյցին ճարտարապետական առանձնայատկութիւններուն պահպանումը եւ շեշտելով, որ ամէն անգամ, երբ Հայ կաթողիկէ համայնքը փափաք յայտնէ, արտօնութիւնը պէտք է տրուի պաշտամունք կատարելու։
Կաթողիկէ Հայոց արքեպիսկոպոսարանին կողմէ հրապարակուած մամլոյ հաղորդագրութեան մէջ կը շեշտուի, որ Վաքըֆներու խորհուրդին որոշումը ընդունուեցաւ միաձայնութեամբ։
