Եվրոպայի խորհրդի հակակոռուպցիոն մարմինը՝ GRECO-ն, հրապարակել է հերթական զեկույցը Գնահատման չորրորդ փուլի շրջանակում արված առաջարկությունների կատարման վերաբերյալ:
GRECO- ն եզրակացրել է, որ Հայաստանը որոշ սահմանափակ քայլեր կատարել է` Գնահատման չորրորդ փուլի շրջանակում արված առաջարկություններին ընդառաջ, այնուամենայնիվ, արված 18 առաջարկություններից բավարար չափով կատարված են միայն 7-ը, 11 առաջարկություն կատարվել է մասամբ:
Զեկույցում նշվում է, որ պատգամավորների մասով պետք է առաջնահերթություն տրվի օրենսդրական գործընթացի թափանցիկությանը` շեշտը դնելով օրենքի մշակման գործընթացում հասարակության ներգրավվածության և «հրատապ ընթացակարգերի» կիրառման վրա: «Պատգամավորների էթիկայի օրենսգրքի նախագիծը և Ազգային ժողովի կանոնակարգում փոփոխություններ կատարելու նախագիծը, որը նախատեսում է ստեղծել պատգամավորների՝ էթիկայի նորմերին անդամների համապատասխանության վերահսկման մեխանիզմ, մշակվել է, բայց դեռ չի ներկայացվել GRECO-ի ուսումնասիրությանը: Պատգամավորների գործունեության վերահսկողությունը դարձել է ավելի համակարգված, բայց դեռ շոշափելի արդյունքներ չկան»,- ասվում է զեկույցում:
Ինչ վերաբերում է դատական համակարգին, նշվում է, որ դատավորների նկատմամբ կարգապահական ընթացակարգերում Արդարադատության նախարարի դերը չի դադարեցվել, և ներկայիս իրավիճակը անհամատեղելի է դատական անկախության հետ: Բողոքարկման ճիշտ մեխանիզմներ են գործում դատավորների ընդունման և առաջխաղացման, բայց ոչ ազատման վերաբերյալ որոշումների համար: Թեև դատախազների ներքին խորհրդակցության մեխանիզմը առանձնացվել է կարգապահական մարմիններից, չկա որևէ ապացույց, որ այն գործնականում աշխատում է:
Կարդացեք նաև
Ուժեղացված դրույթներ են մտցվել պատգամավորների, դատավորների և դատախազների նվերների մասով, սակայն չի հաստատվել, թե արդյոք գործում է թույլատրելի նվերների գրանցման ընթացակարգ: Բացի այդ, դեռևս պետք է ձեռնարկվեն համապատասխան միջոցներ՝ ապահովելու ակտիվների հայտարարագրման, շահերի բախման, անհամատեղելիության և նվերների վերաբերյալ Կոռուպցիայի կանխարգելման հանձնաժողովի կանոնների արդյունավետ վերահսկողություն և կիրառում: Հանձնաժողովի գործառնական անկախության ամրապնդմանն ուղղված միջոցառումները դեռևս պետք է ապացուցեն իրենց արդյունավետությունը, և նրա ռեսուրսները պետք է համապատասխանեցվեն նրա էականորեն ավելացված մանդատին և լիազորություններին:
Վերոգրյալի լույսի ներքո, GRECO- ն նշում է, որ առաջարկությունների կատարման ներկայիս մակարդակը մնում է «գլոբալ առումով անբավարար»: Ըստ այդմ, GRECO- ն հայաստանյան պատվիրակության ղեկավարին խնդրում է հաշվետվություն ներկայացնել կարևոր առաջարկությունների իրականացման համար ձեռնարկված միջոցառումների վերաբերյալ հնարավորինս շուտ, մինչև 2022 թվականի սեպտեմբերի 30 -ը:
Պատրաստեց Վիկտորյա ԱՆԴՐԵԱՍՅԱՆԸ
