Ծանրամարտի Եվրոպայի երիտասարդական առաջնությունում տղաների մինչեւ 23 տարեկանների պայքարում Հայաստանը ներկայացնող 81 կգ քաշային Ռաֆիկ Հարությունյանը երկամարտի 345 կգ արդյունքով նվաճեց չեմպիոնի կոչումը:
Պոկում վարժությունում 155 կիլոգրամից հետո երրորդ մոտեցմամբ Ռաֆիկը չֆիքսեց 160 կգ-ն եւ բավարարվեց չորրորդ տեղով: Դրա փոխարեն մեր ծանրորդը մրցակիցներին գերազանցեց հրում վարժությունում: Նա առաջին մոտեցմամբ բարձրացրեց 190 կգ ծանրաձողը, ինչը բավական էր ոչ միայն այս վարժությունում փոքր ոսկին, այլեւ երկամարտում Եվրոպայի չեմպիոնի կոչումը նվաճելու համար: Եվ բնական էր, որ հայաստանցին հրաժարվեց հաջորդ երկու մոտեցումներից:
U23 տարիքային խմբում երեկ մրցահարթակ մտավ նաեւ 73 կգ քաշային Արմեն Գրիգորյանը, որի ցույց տված կիլոգրամները՝ 142+170=312, հինգերորդ ցուցանիշն էին:
Աշոտ ՀԱԿՈԲՅԱՆ
