Սույն թվականի սեպտեմբերի 28-ին ԱՀ տարածքային կառավարման և ենթակառուցվածքների նախարարությունն իր ֆեյսբուքյան էջում կոչով դիմել էր ԱՀ դատախազությանն ու ԱՀ քննչական կոմիտեին «նախաքննության փուլում զերծ մնալ հաղորդագրություններ տարածելուց և չվերածվել հայաստանյան դեղին մամուլի մասնաճյուղերին»:
Նախ նշենք, որ ԱՀ քննչական կոմիտեն իր կազմավորման առաջին իսկ օրից որդեգրել է բաց և թափանցիկ աշխատելու գործելաոճ։ Ինչ վերաբերվում է ԱՀ քննչական կոմիտեի կողմից տարածված տեղեկատվությանը՝ տնտեսվարողի կողմից խարդախությամբ հափշտակելու, իսկ ԱՀ տարածքային կառավարման և ենթակառուցվածքների նախարարության պաշտոնատար անձի /անձանց/ կողմից գործընթացի նկատմամբ ոչ պատշաճ հսկողություն իրականացնելու հետևանքով պաշտոնական անփութությամբ պետությանն առանձնապես խոշոր չափ կազմող գույքային վնաս պատճառելու վերաբերյալ դեպքերին, ապա նշենք, որ հրապարակումները ներկայացվել են նախաքննության շահերի խստիվ պահպանմամբ և անմեղության կանխավարկածի ապահովման տեսանկյունից, այսինքն, որևէ հրապարակման մեջ բացարձակապես չեն նշվել հանցագործության հնարավոր կատարողների անհատական տվյալները, այլ ներկայացվել են միայն հանցագործության դեպքերը:
Բացի այդ, նշենք, որ «Տեղեկատվության ազատության մասին» ԱՀ օրենքի 8-րդ հոդվածով օրենսդիրը բնորոշել է տեղեկատվության տրամադրման այնպիսի սահմանափակումներ, ինչպիսիք են պետական, ծառայողական, բանկային, առևտրային գաղտնիք պարունակող, մարդու անձնական և ընտանեկան կյանքի գաղտնիությունը խախտող և հրապարակման ոչ ենթակա նախնական քննության տվյալներ։ Իսկ ահա նույն օրենքի 12-րդ հոդվածով տեղեկատվություն տնօրինողին հստակ պահանջ է ներկայացվում օրենքով սահմանված կարգով ապահովել տեղեկությունների մատչելիությունը և հրապարակայնությունը:
Առնվազն տարակուսելի է ԱՀ տարածքային կառավարման և ենթակառուցվածքների նախարարության կողմից, այսպես ասած, ԱՀ քննչական կոմիտեին ուղղված կոչը, քանի որ պետական սուղ միջոցներից տարբեր սոցիալական ծրագրերով տեղահանվածներին ուղղված ֆինանսական միջոցների խարդախությամբ հափշտակելը, իսկ ԱՀ տարածքային կառավարման և ենթակառուցվածքների նախարարության համապատասխան պաշտոնատար անձի /անձանց/ կողմից գործընթացի նկատմամբ ոչ պատշաճ հսկողություն իրականացնելը հանցավոր արարք է, որը ենթակա է նաև համընդհանուր պարսավանքի՝ հետապնդելով նաև կանխարգելիչ հատկություն, ուստի կհորդորենք ԱՀ տարածքային կառավարման և ենթակառուցվածքների նախարարությանն իրենց ժամանակը սոցիալական ցանցերում գրառումներ պատրաստելու և հրապարակելու փոխարեն ձեռնամուխ լինեն ամենայն պատասխանատվությամբ իրենց պարտականությունները կատարելուն:
Կարդացեք նաև
ԱՀ քննչական կոմիտե
ԱՀ տարածքային կառավարման և ենթակառուցվածքների նախարարության սեպտեմբերի 28-ի ֆեյսբուքյան գրառումը
ԱՀ տարածքային կառավարման և ենթակառուցվածքների նախարարության միջոցով իրականացվում է տեղահանվածների տեղավորման և վարձավճարների փոխհատուցման գործընթաց: Ամեն ամիս ստուգելով տնտեսվարողներին՝ նախարարությունը հայտնաբերում է բազմաթիվ խախտումներ, կազմում արձանագրություններ կամ կնքում համաձայնագրեր տնտեսվարողների հետ: Այդ եղանակով ամեն ամիս տասնյակ միլիոնավոր դրամների խախտում է հայտնաբերվում և վերականգնվում: Ստուգումները և ստուգայցերը մշտական գործընթաց են, որ իրականացվում են անընդհատ: Ներկայացնում ենք երկու տվյալ. հունվար ամսին հյուրանոցային ծառայությունների և սննդի համար 596 անձի հաշվով վճարվել է մոտ 180 միլիոն դրամ, իսկ հուլիս ամսին՝ մոտ 255 միլիոն դրամ 1960 անձի համար: Այսպիսով, վճարվող գումարը ավելացել է 30 տոկոսով, իսկ շահառուների թիվը ավելացել է ավելի քան երեք անգամ: Ակնհայտ է, որ ոլորտում եղել են գերշահույթներ, որը նախարարության համառ ջանքերի շնորհիվ զգալիորեն պակասեցվել է և դեռ պակասեցվելու է:
Մեզ համար ակնհայտ է, որ նման քաղաքականությունը բերելու էր նախարարության դեմ հարձակումների տարբեր շրջանակների կողմից: Կոչ ենք անում ԱՀ Դատախազությանը և ԱՀ Քննչական կոմիտեին նախաքննության փուլում զերծ մնալ հաղորդագրություններ տարածելուց և չվերածվել հայաստանյան դեղին մամուլի մասնաճյուղերի:
