«Մենք Հայաստանի հանրապետության տարածքով բեռնափոխադրումներ իրականացնողների կարիքների մասին ամենօրյա, ամենժամյա ռեժիմով դիտարկումներ ենք իրականացնում, կապի մեջ ենք»,-այս մասին այսօր ԱԺ-ում լրագրողների հետ ճեպազրույցում ասաց ՊԵԿ նախագահ Ռուստամ Բադասյանն՝ անդրադառնալով Գորիս-Կապան ճանապարհի Որոտանի հատվածում ադրբեջանական ոստիկանական հենակետ տեղադրելուն եւ իրանցի բեռնափոխադրողներից գումարներ պահանջելուն։
ՊԵԿ նախագահի խոսքով՝ Որոտանի հատվածում ստեղծված խնդրի լուծումը էականորեն կապված է նաեւ այլ գերատեսչությունների իրականացվող աշխատանքների հետ՝ ճանապարհաշինարարական նախագծեր եւ այլն։
«Մենք գործառույթների շրջանակներում ամեն ինչ անում ենք, որպեսզի բեռնափոխադրումները Հայաստանի հանրապետության տարածքով իրանցի վարորդների համար իրականացվեն հնարավորինս հարմարավետ, մաքսային տերմինալներով սպասարկումն իրականացվի հարմարավետ եւ հավելյալ խնդիրներ չառաջանան տնտեսվարողների համար։ Իսկ խնդրի վերջնական լուծումն ավելի համալիր գործողություններ է ենթադրում, որի շուրջ կառավարությունն աշխատում է»,-ասաց Բադասյանը։
Դիտարկմանը, թե Նիկոլ Փաշինյանն ասել էր, որ Գորիս-Կապան ճանապարհի 21 կմ հատվածը վիճելի է, Բադասյանն ասաց՝ դա զգայուն խնդիր է, եւ վերաբերում է ԱԱԾ ոլորտին։ Նա հորդորեց սպասել ու հետեւել կառավարության դիրքորոշումներին՝ նշված խնդրի վերաբերյալ։
Կարդացեք նաև
Նելլի ԲԱԲԱՅԱՆ
