2020թ․-ին Արցախի դեմ ադրբեջանաթուրքական լայնածավալ պատերազմի հետեւանքով զոհվել է Արցախի քաղաքացի 742 զինծառայող, իսկ Արցախի քաղաքացիություն ունեցող 45 զինծառայող մինչեւ օրս համարվում է անհետ կորած․ սպանվել է 80 քաղաքացիական անձ, որից 42-ը՝ թիրախային հարվածների հետեւանքով։ Գերեվարման մեջ են 38-ը։ Այս մասին այսօր ՀՀ ԱԺ մարդու իրավունքների պաշտպանության եւ հանրային հարցերի մշտական հանձնաժողովում աշխատանքային քննարկման ժամանակ հայտարարեց ՀՀ-ում Արցախի հանրապետության մշտական ներկայացուցիչ Սերգեյ Ղազարյանը:
«Պատերազմի հետեւանքով մոտ 42 000 տեղահանվածներ ունենք, որոնցից մոտ 38 000-ը կորցրել է տունն ու բնակավայրը։ Տեղահանվածներից մոտ 15 000-ը գտնվում է Ստեփանակերտում, իսկ մոտ 5000-ը՝ շրջաններում։ Հազարից ավելի մարդ ապրում է հյուրանոցներում։ Նախատեսվում է մինչեւ տարեվերջ Ստեփանակերտում կառուցել 300 բնակարան՝ տեղահանվածներին հատկացնելու նպատակով։ Շրջաններում չբնակեցված տները եւս կներառվեն այս ծրագրում»,-հայտնեց Սերգեյ Ղազարյանը։
Նրա խոսքով՝ Արցախն այս պահին ունի բնակֆոնդի ավելացման սուր կարիք․ «Որոշ ծրագրեր արդեն իսկ սկսվել են, մինչեւ տարեվերջ կավարտվեն։ Մեծ վնասներ են կրել նաեւ Արցախի ենթակառուցվածքները։ 36 գործող ՀԷԿ-երից մնացել են 6-ը։ Վարելահողերի 75%-ը մնացել է Ադրբեջանի վերահսկողությանը»։
Սերգեյ Ղազարյանը նաեւ նշեց, որ Արցախից տեղահանված մոտ 20 000 քաղաքացի այսօր ապաստան է գտել ՀՀ-ում, որոնցից 70%-ը՝ մարզերում, իսկ 30%-ը՝ Երեւանում։
Կարդացեք նաև
Լուիզա ՍՈՒՔԻԱՍՅԱՆ
