Այսօր Շիրակի մարզի նախկին ու ներկա բարձրաստիճան պաշտոնյաները, մարզային ու քաղաքային իշխանությունների, ուժային կառույցների ներկայացուցիչները, զինվորականներն ու հոգևորականները, ուսանողները, բուհերի ու տարբեր կառույցների աշխատակիցները իրենց հարգանքի տուրքը մատուցեցին Գյումրու «Շիրակ» գերեզմանատանը ննջող հերոսներին։ Քաղաքացիների հոսքը «Շիրակ» գերեզմանատուն չէր դադարում։
Բառեր արտաբերել անհնար էր, և եթե որևէ խոսք էր հնչում, դա նահատակված հերոսի հարազատի երկխոսությունն էր նրա հետ՝ որպես հավերժ ներկայի․․․
Կարդացեք նաև
Լռությունը երբեմն խախտվում էր աղիողորմ հեծկլտոցներով, երբեմն էլ պանթեոնում ընթացող շինարարական աղմուկով։
Գյումրու քաղաքապետ Սամվել Բալասանյանի հորդորով կառավարությունը համաձայնել է Գյումրու քաղաքապետարանի հետ համատեղ համաֆինանսավորել պանթեոնի շինարարությունը։
Գյումրու գլխավոր ճարտարապետ Հենրիկ Գասպարյանը մեզ հետ զրույցում տեղեկացրեց, որ 93 միլիոն դրամ հատկացրել է կառավարությունը, 29 միլիոն դրամ էլ՝ Գյումրու քաղաքապետարանը։ Շինարարությունը շուտով կավարտվի, պանթեոնում հուղարկավորված են միայն 44 օրյա պատերազմի հերոսները՝ 81 հոգի:
«44 օրյա պատերազմում մեր նահատակված հերոսները շատ են, բայց նրանց կեսն ուրիշ տեղ է հուղարկավորված, ընտանեկան գերեզմաններում», -ասաց ճարտարապետը։
Նունե ԱՐԵՎՇԱՏՅԱՆ
