Զանգեզուրի միջանցքի բացումը նախապայման է Հայաստանի հետ բանակցությունների մեկնարկի համար: Այս մասին թուրքական «Անադոլու» գործակալությանը տված հարցազրույցում հայտարարել է Ադրբեջանի նախագահ Իլհամ Ալիևը:
«Իհարկե, դա պահանջ է: Քանի որ այդ մասին ասվում է նոյեմբերի 10-ի հայտարարության մեջ: Հայաստանը ստանձնել է այդպիսի պարտավորություն: Եթե չկատարի այդ պարտավորությունը, ապա ի՞նչ կարգավորման մասին կարող է խոսք լինել… Հայաստանը պետք է ճիշտ վերլուծի հետպատերազմական շրջանը: Հիմա միանգամայն այլ իրողություն է… Ուստի, ստեղծված իրավիճակում ես կարծում եմ, որ Հայաստանը լավ կանի առավել շատ ջանքեր ներդնի Ադրբեջանի հետ հարաբերությունների կարգավորման ուղղությամբ: Քանի որ դա կարևոր է նրանց համար: Մենք առանց դրա էլ կարող ենք ապրել: Ինչպես որ ապրել ենք նախկինում»,- ասել է Ալիևը:
Ալիևը նշել է, որ «Զանգեզուրի միջանցքի» բացման հետ կապված արդեն աշխատանքներ են տարվում Ադրբեջանի տարածքում:
«Մենք Ադրբեջանում սկսել ենք լայնածավալ աշխատանքներ Զանգեզուրի միջանցքի ստեղծման ուղղությամբ: Զանգելանում կառուցվում է երկաթուղի և մայրուղի, օդանավակայաններ: Կարծում եմ մեր տարածքում մենք աշխատանքները կավարտենք երկու տարվա ընթացքում, քանի որ աշխատանքների ծավալը շատ մեծ է: Հայաստանի տարածքում երկաթուղու և մայրուղու երկարությունը կլինի 40կմ: Դա կարող է տևել մեկից մեկուկես տարի»,- ասել է նա:
Կարդացեք նաև
Ադրբեջանի նախագահը հայտարարել է, թե Հայաստանը պետք է ձգտի կարգավորել հարաբերությունները նաև Թուրքիայի հետ:
«Հայաստանն առաջին հերթին պետք է ձգտի կարգավորել հարաբերությունները Թուրքիայի հետ: Միաժամանակ կարգավորի հարաբերություններն Ադրբեջանի հետ: Թող հստակեցնի իր սահմաններն Ադրբեջանի և Թուրքիայի հետ: Նրանք պետք է առավել շատ ջանք գործադրեն այդ ուղղությամբ, քան մենք»,- ասել է նա:
Անդրադառնալով Հայաստանի սահմաններ ներխուժելուն՝ Ալիևն ասել է, որ ադրբեջանական ուժերը «մոտեցել են Հայաստանի սահմաններին և տեղակայվել իրենց տարածքներում՝ համաձայն մեր քարտեզների»: «Եթե Հայաստանն այլ կարծիք ունի, թող նստի բանակցությունների սեղանի շուրջ: Կքննարկենք: Դա կարող է տևել մեկ տարի, հինգ տարի, 30, ով գիտի: Կրկնում եմ՝ Հայաստանը պետք է գիտակցի այսօրվա իրողությունը սահմանների հարցում: Ամենակարճ ժամկետներում նա պետք է ընդունի մեր պայմանները, և լուծի այս խնդիրը, որպեսզի յուրաքանչյուրն իմանա իր սահմանները»,- ասել է Ալիևը:
Պատրաստեց Վիկտորյա ԱՆԴՐԵԱՍՅԱՆԸ
