Այսօր ՔՊ խմբակցության պատգամավոր, ԱԺ ֆինանսավարկային եւ բյուջետային հարցերի հանձնաժողովի նախագահ Գեւորգ Պապոյանին հարցրեցինք՝ ի՞նչ քայլեր են ձեռնարկում՝ արտագաղթի ալիքը կանգնեցնելու համար, որովհետեւ հրապարակվեց, որ 2500 հադրութցի արդեն լքել է Հայաստանը: Նա պատասխանեց, որ արտագաղթի թվերի մեջ մանիպուլյացիա կա. եթե նախորդ տարվա ցուցանիշի հետ համեմատեն, ճանապարհները այն ժամանակ փակ էին, հիմա բաց են. «Կարեւոր է դիտարկել խորքային պատճառները: Եթե թիվը դիտարկենք տարվա կեսի, ասենք՝ սեպտեմբերի 27-ի դրությամբ, էլի մեթոդական առումով սխալ է լինելու: Մենք շատ լավ գիտենք, որ մարտ ամսին ՌԴ գնացած մարդկանց մեծ մասը նոյեմբերի վերջին վերադառնում է տուն: Դա արտագաղթ չի, եթե մարդը գնում է ժամանակավոր աշխատանքի, հետո վերադառնում է, հետո նորից գնում է»:
Նա ասաց, որ արտագաղթը մարտահրավեր է ու դա եղել է ե՛ւ 90-ականներին, ե՛ւ 2000-ականներին ու դժվար է հասնել նրան, որ արտագաղթ չլինի:
Հարցին՝ երբ մենք անվտանգության հարց չենք լուծել, արտագաղթը ո՞նց եք էականորեն նվազեցնելու՝ Պապոյանը վկայակոչեց ՔՊ-ի նախընտրական ծրագիրը եւ կառավարության ծրագիրը. «Շատ հստակ նշված է այնտեղ մեր պարտավորությունը՝ Հայաստանում խաղաղության դարաշրջան բացելու մասին: Երբ որ մենք խոսում ենք այդ խաղաղության, սահմանագծման ու սահմանազատման մասին, դա հենց այդ խնդրի լուծման պատճառով է: Մենք ինքներս շատ լավ հասկանում ենք, որ եթե ուզում ենք արտագաղթ քիչ լինի, դրա լուծումներից մեկը հենց խաղաղության դարաշրջանն է: Եթե մենք ուզում ենք, որ սահմանները անվտանգ լինեն եւ մարդիկ մտածեն երեխա ունենալու մասին, մենք նորից պետք է վերադառնանք այդ խաղաղության դարաշրջանի տրամաբանության մեջ եւ դրա ուղղությամբ շեշտակի քայլեր իրականացնենք: Ինձ զարմացնում են քննադատությունները, եթե խաղաղության դարաշրջան չունես, որտե՞ղ ես դու գնում: Սահմանագծման, սահմանազատման նպատակը հենց դա պետք է լինի, որպեսզի Հայաստանում երկարատեւ խաղաղություն սահմանվի ու դա տեսանելի լինի: Դրա չլինելու հիմքեր ըստ էության չլինեն»:
Հիշեցրինք, որ խաղաղության գինը թշնամիները հրապարակել են՝ Ադրբեջանի տարածքային ամբողջականության ճանաչում, մենք պատրաս՞տ ենք այդ գինը վճարել՝ Պապոյանը պատասխանեց, որ այդ հարցերն ուղղենք մեր ԱԳՆ-ին. «Մեր խնդիրը Հայաստանում խաղաղության դարաշրջան բացելն է: Խաղաղության դարաշրջան բացելը դա միայն մի երկրի հետ չի»:
Կարդացեք նաև
Դիտարկմանը՝ մեր խաղաղության հիմնական խոչընդոտները գիտենք ովքեր են՝ Ադրբեջանը մեր ռազմագերիներին չի տալիս, խոշտանգում է, Թուրքիան սպառնում՝ ո՞ւմ հետ գնալ խաղաղության՝ Պապոյանն ասաց, որ ավելի դետալացված պատասխաններ կտան ոլորտի պատասխանատուները:
Հռիփսիմե ՋԵԲԵՋՅԱՆ
