Դիլիջան քաղաքի ամենագեղեցիկ ու կոլորիտային վայրում՝ Ամֆիթատրոնում Eventtоura կազմակերպությունը կազմակերպել էր գունեղ միջոցառում. ներկայացված էին ավելի քան 15 արվեստագետներ՝ իրենց 200 աշխատանքներով, տավուշյան գինի արտադրողներ: Միջոցառումը «համեմված» էր ջազ երաժշտությամբ:
Ինչպես Aravot.am-ի հետ զրույցում նշեց նկարչուհի, գեղանկարչական ցուցահանդեսների կազմակերպիչ, ՀՀ նկարիչների միության Տավուշի մասնաճյուղի նախագահ Արմինե Թումանյանը, իրեն դիմել էին Eventtоura-ի ներկայացուցիչները եւ հայտնել մտահղացման մասին, ինքն էլ խորհուրդ է տվել միջոցառումը կազմակերպել Ամֆիթատրոնում, որտեղ ե՛ւ զբոսաշրջիկներ են այցելում, ե՛ւ տարածքը բաց է, ու ամեն ոք կարող է ներկա գտնվել:
Կարդացեք նաև
«Իմ նպատակն էր ցուցադրել հենց տավուշցի նկարիչներին: Մենք ունենք բազում հետաքրքիր վայրեր ու արվեստագետներ ունենք, օրինակ, Կողբի արվեստի դպրոցը, Բերդում կան լավ նկարիչներ, Իջեւանում է գտնվում Գեղարվեստի ակադեմիայի դիզայնի ֆակուլտետը…Իմ կարծիքով, ինչքան հնարավոր է, պետք է խթանել մարզերում ապրող արվեստագետների աշխատանքների ցուցադրությունը: Ցավոք, այսօր մի քիչ պասիվ էր նրանց մասնակցությունը, բայց հույս ունեմ, որ սա կհամարեն լավ օրինակ եւ հաջորդ անգամ ավելի համարձակ կլինեն»,-նշեց տիկին Թումանյանը:
Ամֆիթատրոնում, ի թիվս այլ արվեստագետների աշխատանքների, ցուցադրվում էին նաեւ Արմինե Թումանյանի ֆիգուրատիվ եւ աբստակտ գործերը: Նկարչուհու տպավորությամբ մարզերում այնքան էլ չեն ընդունում աբստակտ ոճի աշխատանքները, քանի որ, նրա ձեւակերպմամբ. «Այդ դեպքում մի քիչ ավելի ազատություն է պահանջվում, որ դու աբստակցիայում համարձակություն դրսոեւորես, նոր ձեւի շարժումներ անես: Մենք բոլորս սովորում ենք ակադեմիական նկարչություն, բայց երբ դուրս ես գալիս ակադեմիական ոճից, այդ ժամանակ միայն կարող ենք հետք թողել: Ես ուզում եմ, որ մարզերի նկարիչները եւս լինեն համարձակ, չքաշվեն ու կարծրատիպերից դուրս գալով ստեղծագործեն»:
Հավելենք, որ Արմինե Թումանյանը 2008 թվականից մասնակցել է բազմաթիվ ցուցահանդեսների, այդ թվում ՝ Կանադայում, Թայվանում, Ճապոնիայում, Ֆրանսիայում, Սերբիայում եւ այլուր:
Գոհար ՀԱԿՈԲՅԱՆ
