«Տևական ժամանակ մեզ փորձում են պարտադրել ժողովրդավարության և անվտանգության միջև ընտրություն: Դա կեղծ նորմատիվ է: Դա համարում են չափազանց կեղծ ընտրության առաջադրում»,- «Անկախություն, ժողովրդավարություն, անվտանգություն» խորագրով առաջին համաժողովի ընթացքում հայտարարեց «Հանուն Հանրապետության» կուսակցության ղեկավար Արման Բաբաջանյանը:
Նշենք, որ համաժողովն իրականացվում է «Հանուն Հանրապետության» կուսակցության նախաձեռնությամբ:
Արման Բաբաջանյանը վստահեցրեց՝ ժողովրդավարությունն ու անվտանգությունը ոչ միայն չեն հակադրվում, այլև միմյանց փոխադարձ կապված արժեքներ են: Նրա համոզմամբ՝ չկա անվտանգություն առանց ժողովրդավարության. «Կա ընտրություն, որը ՀՀ-ում կերաշխավորի կայուն ժողովրդավարական ընթացք և կընդլայնի անվտանգությունը: Դրա առավել մեծ համատեքստում է ՀՀ անկախության, ինքնիշխանության, տարածքային ամբողջականության խնդիրը և Արցախի՝ հայկական կենսունակության պահպանման հարցը»:
Անդրադառնալով համաժողովի խորագրին՝ Արման Բաբաջանյանը նկատեց. «Մեր համոզմամբ՝ անկախությունը, ժողովրդավարությունն ու անվտանգությունը կազմում են այն հյուսվածքը, դիմադրողունակության այն շերտը, որը հնարավորություն է տալիս ՀՀ-ին այսօր այս իրավիճակում առաջ շարժվել: Մենք վստահ ենք, որ անկախությունը, ժողովրդավարությունն ու անվտանգությունն են այն հիմնասյուները, որոնց վրա պետք է հիմնված լինեն մեր պետության հիմքերը»:
Կարդացեք նաև
Արման Բաբաջանյանը շեշտեց՝ սեփական ճակատագրի որոշումն ուրիշին զիջելն անթույլատրելի ու վտանգավոր է: Ու հայտարարեց. «Ժողովրդի քվեն, նրա կամարտահայտությունը, ձայնը պետք է պաշտպանվեն օրինական բոլոր միջոցներով: Մենք հասել ենք մի կետի, երբ կարող ենք հաստատապես ասել, որ ժողովրդավարությունն է մնացել մեր երկրի անկախությունը երաշխավորող ու պայմանավորող վերջին միջոցը»:
Տաթև ՀԱՐՈՒԹՅՈՒՆՅԱՆ
