«Ճանապարհ դեպի ժողովրդավարություն» խորագրով լուսանկարների ցուցահանդես Ազգային ժողովում
Սեպտեմբերի 24-ին ՀՀ անկախության 30-ամյակի միջոցառումների շրջանակում ՀՀ Ազգային ժողովում տեղի է ունեցել «Ճանապարհ դեպի ժողովրդավարություն» խորագիրը կրող լուսանկարների ցուցահանդեսի բացումը, որն իրականացվել է «Արմենպրես» լրատվական գործակալության հետ համատեղ:
ՀՀ ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանը, շնորհակալություն հայտնելով ԱԺ-ի աշխատակազմին եւ «Արմենպրես» լրատվական գործակալությանը ցուցադրությունը կազմակերպելու համար, նշել է՝ ժողովրդավարությունը Հայաստանում տարբեր ժամանակահատվածներում մշտապես ենթարկվել է տարատեսակ փորձությունների. «Հայաստանի անկախացումից ի վեր, չնայած սկզբնական ժամանակահատվածի տարատեսակ լրջագույն սոցիալական խնդիրներին, ինչպես նաեւ զուգահեռ ընթացող պատերազմին, ՀՀ-ն ուներ տարածաշրջանում ժողովրդավարության կղզյակի համբավ: Ցավալիորեն, հետագայում տարբեր իրադարձությունների հետեւանքով մենք շեղվեցինք այդ ուղղությունից»: Այս համատեքստում Էդուարդ Աղաջանյանն առանձնացրեց երկու իրադարձություն, որոնք երկար ժամանակ ՀՀ-ին շեղել են վերոնշյալ ուղղությունից: Ըստ Աղաջանյանի՝ դրանք 1996-ի նախագահական ընտրություններն ու 1999-ի հոկտեմբերի 27-ի ոճրագործությունն են:
Կարդացեք նաև
Հանձնաժողովի նախագահի խոսքով՝ 2018-ի հեղափոխությունից հետո եւս ժողովրդավարությունը շարունակ ենթարկվել է տարատեսակ փորձությունների՝ համավարակ, պատերազմ եւ այլ դժվարություններ: «Թե՛ գործող իշխանությունը, թե՛ հետագայում ձեւավորվելիք իշխանությունները պետք է գիտակցեն, որ այդ փորձությունների միջով պետք է մշտապես անցնեն եւ ռիսկերի կառավարմանը զուգահեռ երբեք չշեղվեն ժողովրդավարական ուղուց»,-նշել է նա:
«Արմենպրես» լրատվական գործակալության տնօրեն Արամ Անանյանը նշել է, որ լուսանկարների ընտրությունը կատարվել է խորհրդանշական եղանակով. ընտրվել են անկախությունը ու անկախության շարունակականությունը խորհրդանշող լուսանկարները. «Ցուցադրված է թվով 15 արխիվային եւ 15 արդի լուսանկար: Փորձել ենք ուշադրություն դարձնել անկախության սիմվոլներին՝ Հայաստանի ճանապարհին՝ դեպի ժողովրդավարական պետություն, դեպի այն պետությունը, որի հիմնադրույթները սահմանված են թե՛ Անկախության հռչակագրով, թե՛ մեր Սահմանադրությունով»:
Արամ Անանյանը շնորհակալություն է հայտնել լրագրողներին, լուսանկարիչներին, որոնք տարիներ շարունակ հավաքել են բացառիկ գզրոցը, որի միջոցով վերականգնվում են ժամանակակից պատմության վերջին տասնամյակները:
Լուսանկարների ցուցադրության հետ միաժամանակ ներկայացվեց նաեւ փաստագրական ֆիլմ՝ «Անկախության աչքեր» անվանմամբ՝ նվիրված Հայաստանի Հանրապետության անկախության օրվան:
ՀՀ Ազգային ժողով
