«Ժողովուրդ ջան, համայնքը չի ցրվում։ Ցրվել՝ նշանակում է ցրել, իրարից անջատել։ Մենք ոչ թե ցրում ենք, այլ ավելի ենք միավորում»,-խորհրդարանում լրագրողների հետ ճեպազրույցում այսօր անդրադառնալով Գեղարքունիքի մարզի Գեղամասարի համայնքապետ Հակոբ Ավետյանի պնդմանը, թե Գնել Սանոսյանն իրեն ասել է, որ ինքը դատվելու է, համայնքն էլ՝ խոշորացման անվան տակ ցրվելու է, ասաց ՀՀ տարածքային կառավարման եւ ենթակառուցվածքների նախարար Գնել Սանոսյանը։
Հիշեցնենք՝ Հակոբ Ավետյանը կարծում է, որ համայնքների խոշորացումը քաղաքական նպատակ ունի, որպեսզի իշխանությունն ազատվի ընդդիմադիր համայնքապետերից։
Այս առնչությամբ Գնել Սանոսյանը նշեց․ «Գործող համայնքի ղեկավարը կվերանշանակվի մինչեւ ընտրություն, թե այլ մեկը, դա էական չի։ Համայնքը ցրելու խոսակցություն չկա։ Գեղամասարի մեր գործընկերները, երբ խոսում են խոշորացումից, ասում են, որ դա լավ բան է, որ առաջին անգամ խոշորանալուց հետո խնդիրներ են լուծվել։ Արդյոք ավելի մեծ խոշորացումը լա՞վ է։ Փորձը ցույց է տալիս, որ այո։ Բավական ժամանակ է, որ չեմ հանդիպել Հակոբ Ավետյանի հետ։ Ինչ վերաբերում է դատվելուն, նման խոսակցություն եղել է 2019թ․-ին, ապա ես ասել եմ՝ նա չի հավաքագրում հարկերը, ուստի կամ պետք է պայմանագրերը խզի, կամ դիմի դատարան։ Ասել եմ՝ եթե չանեք, անգործություն կլինի, ձեզ կդատեն։ Քանիցս Հակոբ Ավետյանին ասել եմ՝ կամ զբաղվիր բիզնեսով, կամ թող ու գյուղով զբաղվի։ Հակոբը որոշ բաներ է խոսեր, որ չպետք է ասեր, բայց ոչինչ, ես ներողամիտ եմ»։
Կարդացեք նաև
Լուիզա ՍՈՒՔԻԱՍՅԱՆ
