Այսօր կառավարության նիստից հետո լրագրողների հետ ճեպազրույցում Անվտանգության խորհրդի քարտուղար Արմեն Գրիգորյանն անդրադառնալով Թուրքիայի հայտարարություններին, եւ պատասխանելով հարցին՝ ինչ նախապայմանների է միտված հայկական կողմը, որպեսզի Թուրքիայի հետ երկխոսություն սկսվի, իսկ Ադրբեջանը հայտարարում է, որ Հայաստանը պետք է ընտրություն կատարի՝ կամ տարածքային պահանջներ ներկայացնի կամ համագործակցի հարեւանների հետ, ասաց՝ Արցախի հարցը երբեք տարածքային հարց չի եղել, միշտ եղել է ինքնորոշման հարց:
«Հայկական կողմը բազմիցս հայտարարել է, նույնիսկ մեզնից առաջ՝ նախկին իշխանությունների օրոք, որ Թուրքիայի հետ հարաբերությունները պետք է կարգավորել առանց նախապայմանների, որովհետեւ, երբ նախապայմաններ են լինում, դժվար է լինում որեւէ հարցում առաջ գնալ։ Եվ մենք հույս ունենք, որ հարաբերությունների կարգավորումը կլինի առանց նախապայմանների եւ հնարավորություն կլինի երկխոսություն սկսել առանց նախապայմանների: Բոլոր գոյություն ունեցող հարցերը հետագայում քննարկելի են, բայց նախապայմաններով հարաբերություններ սկսելը շատ դժվար կլինի»,-ասաց Արմեն Գրիգորյանը:
Նրա խոսքով՝ նախընտրական շրջանում եւ ընտրություններից հետո իշխանությունը խոսել է տարածաշրջանում խաղաղության հաստատման, խաղաղության դարաշրջանը բացելու եւ կայունություն ապահովելու մասին, եւ այս տրամաբանության շրջանակում նաեւ պետք է կարգավորենք հարաբերությունները Թուրքիայի հետ, այդ կարգավորումը պետք է լինի աստիճանական. «Մենք համոզված ենք, որ այդ հարաբերությունների կարգավորման հնարավորություններից մեկը նաեւ բարձր եւ բարձրագույն մակարդակում երկխոսություն ունենալն է։ Ինչպես քաղաքական տարբեր մակարդակներով հայտարարել ենք, որ Հայաստանը պատրաստ է Թուրքիայի հետ հարաբերությունների կարգավորմանը, դրա տրամաբանության շրջանակում էլ կատարվել են նման հայտարարությունները եւ քաղաքական քայլերը»:
Արմեն Գրիգորյանի ներկայացմամբ՝ պետք է տարանջատել Թուրքիայի հետ հարաբերությունների կարգավորումը Ադրբեջանի հետ հարաբերություններից:
Կարդացեք նաև
Անդրադառնալով Արցախի կարգավիճակի հարցին, Գրիգորյանն ասաց՝ Լեռնային Ղարաբաղի խնդրի կարգավորման միակ եւ կարեւոր հարթակը ԵԱՀԿ Մինսկի խումբն է, եւ անհասկանալի է Ադրբեջանի նախագահի հայտարարությունը, թե Հայաստանը պետք է ձեռնպահ մնա Ղարաբաղի կարգավիճակի հարցից:
Անդրադառնալով՝ Գորիս-Կապան ճանապարհի Որոտանի հատվածում ստեղծված իրավիճակին, երբ ադրբեջանական կողմը իրանական բեռնատարներն է կանգնեցնում, մաքս պահանջում, հայկական ավտոմեքենաներն է կանգնեցնում եւ այլն՝ Գրիգորյանն ասաց. «Ե՛վ մենք, ե՛ւ իրանական կողմը մտահոգված ենք ստեղծված իրավիճակի կապակցությամբ: Այս հարցը քննարկում ենք բոլոր մակարդակներում, որպեսզի հնարավորինս արագ լուծում ստանա: Ե՛վ մեր ռուս գործընկերների, ե՛ւ Ադրբեջանի հետ քննարկումներում բարձրացնում ենք այս հարցն ու ակնկալում արագ լուծել: Խնդրի լուծման ուղղությամբ բանակցությունները շարունակվում են»:
Հարցին՝ արդյոք Գորիս-Կապան ճանապարհն անվտանգ է հայ քաղաքացիների երթեւեկության համար, Գրիգորյանը պատասխանեց. «Նոյեմբերի 9-ից հետո ձեռք բերված պայմանավորվածությունների համաձայն՝ հայկական կողմը պետք է այդ ճանապարհն անվտանգ օգտագործի: Իհարկե, այս ընթացքում խնդիրներ են առաջացել, մտահոգություններ կան, եւ մենք բոլոր քայլերը ձեռնարկում ենք, որ այլեւս որեւէ խնդիր չառաջանա, եւ հույս ունենք, որ այդ ճանապարհը կկարողանանք անվտանգ շահագործել»:
Նելլի ԲԱԲԱՅԱՆ
