Վերջին օրերին օրական պատվաստումների թվի շեշտակի աճ ունենք: Այսօր կառավարության նիստում ասաց առողջապահության նախարար Անահիտ Ավանեսյանը: Ըստ նրա, սեպտեմբերի 22-ին իրականացրել են 9924 պատվաստում, երեկ՝ 8440 պատվաստում: Նախարարի խոսքով, պատվաստման թվերի աճը խոսում է այն մասին, որ քաղաքացիների մոտ վստահությունը մեծացել է: Ըստ Անահիտ Ավանեսյանի, իրականացրած 385 հազար 503 պատվաստումների արդյունքում որեւէ խնդիր չի եղել. «Պատվաստումներն արդյունավետ են, անվտանգ են, պաշտպանում են քովիդով պայմանավորված մահերից»,-ասաց նախարարը` նշելով, որ այս պահին ակտիվ դեպքերի թիվը 11470 է, որից ընդամենը 286-ն են, որ պատվաստված քաղաքացիներ են. «Այո, պատվաստումը 100 տոկոսով չի բացառում վարակման ռիսկը, այն շեշտակի նվազում է, բայց ամենակարեւորը նպատակը այն է, որ այս քաղաքացիները հիվանդությունը տանում են ավելի թեթեւ:
Հիվանդանոցներում գտնվող 2006 քաղաքացիներից ընդամենը 38-ն են, որ պատվաստված են: Շատ երկրներում փաստվում է, որ պատվաստումների արդյունքում կտրուկ նվազում է հոսպիտալացման եւ ծանր դեպքերի ցուցանիշը»:
Անահիտ Ավանեսյանը հիշեցրեց, որ հոկտեմբերի 1-ից աշխատանքի ներկայացող քաղաքացիները պետք է կամ պատվաստված լինեն կամ թեսթի պատասխան ներկայացնեն: Բացառություն կկազմեն բժշկի փաստաթղթով հակացուցում ունեցողներն ու հղի կանայք:
Կարդացեք նաև
Լուսինե ԲՈւԴԱՂՅԱՆ
