ԱԺ մարդու իրավունքների պաշտպանության եւ հանրային հարցերի մշտական հանձնաժողովում քննարկվեցին Հայաստան-Սփյուռք համագործակցությանն առնչվող հարցեր
ՀՀ ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Թագուհի Թովմասյանի նախաձեռնությամբ սեպտեմբերի 23-ին տեղի ունեցավ աշխատանքային հանդիպում ՀՀ Սփյուռքի գործերի գլխավոր հանձնակատար Զարեհ Սինանյանի եւ Արցախի նախագահի խորհրդական-հատուկ հանձնարարությունների գծով ներկայացուցիչ (Սփյուռքի հարցերով) Ազատուհի Սիմոնյանի հետ: Հիմնական թեման Հայաստան-Սփյուռք համագործակցության խնդիրներն ու դրանց լուծման ուղիներն էին:
Մշտական հանձնաժողովի նախագահն ընդգծեց առկա խնդիրների օրենսդրական ճանապարհով լուծման կարեւորությունն ու պատրաստակամություն հայտնեց աջակցել այդ հարցում:
Կարդացեք նաև
Զարեհ Սինանյանը հանգամանալից ներկայացրեց ոլորտում տիրող իրավիճակը, անդրադարձավ Հայաստան-Սփյուռք գործակցության ընթացքում ծագող անվտանգության, տնտեսական, կրթական, պետական կառույցների հետ կապված խնդիրներին: Հայրենադարձության առնչությամբ նա շեշտադրեց ենթակառուցվածքների բացակայությունը, ինչը խոչընդոտում է հարցերի լուծումը: Սփյուռքի գործերի գլխավոր հանձնակատարը տեղեկացրեց, որ առաջիկայում «Հրայր Օհանյան» հիմնադրամի աջակցությամբ մայրաքաղաքի կենտրոնում կկառուցվի Հայրենադարձության կենտրոն, որը կգործի մեկ պատուհան սկզբունքով, կլուծի սփյուռքահայերի ինտեգրմանն առնչվող շատ հարցեր: Ըստ Զարեհ Սինանյանի՝ արդեն իրականացվում են կենտրոնի շինարարական աշխատանքները:
Նշվեց նաեւ, որ Սիրիայից, Լիբանանից եւ այլ երկրներից ներգաղթած մեր հայրենակիցների մի մասը բյուրոկրատական խոչընդոտների պատճառով է լքում Հայաստանը:
Ազատուհի Սիմոնյանը Հայաստան-Սփյուռք գործակցության առնչությամբ կարեւոր համարեց գործընկերային հարաբերությունների ամրակայումը: Նա անդրադարձ կատարեց օրենսդրական սահմանափակումներին, որոնք թույլ չեն տալիս սփյուռքահայերին Հայաստանի գործադիր եւ ընտրովի մարմիններում աշխատել, իրենց փորձառությամբ ու մասնագիտական հմտություններով նպաստել մեր երկրի զարգացմանը:
Հանդիպման ընթացքում անդրադարձ եղավ ոլորտի այլ խնդիրների: Նշվեց, որ նմանօրինակ հանդիպումները կլինեն շարունակական:
ՀՀ ազգային ժողով
