Մոտ օրերս կառավարությունը կքննարկի աշխատող տրանսպորտային միջոցներում գազաբալոնների տեղադրման նոր կարգը, համաձայն որի՝ գազաբալոն տեղադրող ընկերությունը պետք է ունենա լիցենզիա: Փոփոխությունները կատարվել են «Ավտոմոբիլային տրանսպորտի մասին» օրենքում: Այսօր այս մասին «Արմենպրեսի» մամուլի սրահում ասաց տարածքային կառավարման եւ ենթակառուցվածքների նախարարության Ավտոմոբիլային տրանսպորտի քաղաքականության, լիցենզավորման եւ թույլտվությունների վարչության Լիցենզավորման եւ թույլտվությունների բաժնի պետ Արայիկ Ստեփանյանը:
Մինչ այժմ գազաբալոն տեղադրող կազմակերպությունները աշխատել են հավատարմագրված եղանակով, ինչը Արայիկ Ավետիսյանի կարծիքով, չի նպաստել որոտի կանոնակարգմանը:
Վարչական օրենսգրքում կատարված փոփոխությամբ էլ պահանջներ են ներկայացվել գազալցակայանների սեփականատերերին. 200-300-ապատիկի չափով կտուգանվեն այն գազալցակայանները, որոնք իրենց մոտ կլիցքավորեն չլիցենզավորված ընկերության տեղադրած գազաբալոնը: Թե ինչպես են «բռնացնելու», որ գազալցակայանը լիցքավորել է չլիցենզավորված կազմակերպության գազաբալոն, Արայիկ Ավետիսյանն ասում է՝ լինելու է միասնական էլեկտրոնային շտեմարան, որտեղ կներառվեն բոլոր գազաբալոնների վերաբերյալ տվյալները, տրանսպորտային միջոցների պետհամարանիշը, նույնականացման համարը եւ գազաբալոնի հերթական վկայագրման ժամկետները: Հենց այդ տվյալներով էլ ստուգելու են. «Այսինքն՝ ի՞նչ իմաստ կա գազաբալոնը տեղադրել չլիցենզավորված կազմակերպությունում, եթե գազալցակայանն այդպիսի գազաբալոնները չի լիցքավորելու»:
Արայիկ Ավետիսյանը համոզված է, որ դաշտը կանոնակարգելով նվազագույնի կհասցվեն գազաբալոնների պայթյունի դեպքերը:
Ըստ ոլորտի պատասխանատուի, կարգավորումներով շրջանառությունից դուրս կգան բոլոր այն գազաբալոնները, որոնք օգտագործման համար պիտանի չեն. «Իրականացնելով պարբերաբար վկայագրում՝ պիտանելիության ստուգում, որը կատարվում է բարձր ճնշման տակ, հնարավորինս կնվազեցվեն գազաբալոններից տեղի ունեցող դեպքերը: Փոփոխության նպատակն է նաեւ սահմանել միասնական պայմաններ՝ դաշտում գործող բոլոր կազմակերպությունների համար: Լիցենզավորման կարգում պահանջներ կներկայացվեն նաեւ այդ կազմակերպություններում աշխատանքներ կատարող բանվորական եւ ինժեներատեխնիկական անձնակազմին: Խոսքը՝ մասնագիտական որակավորման մասին է: Եվ մինչեւ այս պահանջները չբավարարվեն, կազմակերպությունները չեն կարող լիցենզավորվել»:
Լուսինե ԲՈՒԴԱՂՅԱՆ
