ՀԱԿ փոխնախագահ Լևոն Զուրաբյանի ֆեյսբուքյան գրառումը
Դառը տոնը
Ջերմորեն շնորհավորելով համաքաղաքացիներիս Հայաստանի Հանրապետության անկախության 30-ամյակի կապակցությամբ, չեմ կարող դառնությամբ չնշել հետեւյալը։
Երեսուն տարի առաջ անկախության հանրաքվեին մասնակցելով, անգամ ամենամեծ մղձավանջում չէինք կարողանա երեւակայել, որ երեսուն տարի հետո մենք կունենանք մի խորհրդարան, որում ընդգրկված կլինեն բացառապես այն քաղաքական ուժերը, որոնք կործանարար հարվածներ են հասցրել մեր անկախությանն ու ինքնիշխանությանը։
Կարդացեք նաև
Պետությունն ու հայրենասիրությունը սեփական ժողովրդին թալանելու գործիք դարձրած ավազակները եւ ինքնասիրահարված, տգետ եւ պոռոտախոս պոպուլիստ հիմարները փոխարինեցին իննսունականների նվիրյալներին եւ գլորեցին մեր անկախությունն ու հաղթանակները դեպի անդունդ, ընդ որում՝ ընդունում եմ, որ ամբոխավար հիմարների իշխանության գալը հենց ավազակների անխիղճ կեղեքման հետեւանքն էր եւ է։
Բայց կյանքը շարունակվում է, մեր պետությունը, այնուամենայնիվ, պահպանում է իր իրավական անկախությունը, որը նվաճվել է երեսուն տարի առաջ, եւ մեր բոլորիս պարտքն է տեր կանգնել մեր անկախ պետությանը եւ անել ամեն բան, որ անկախության տոնակատարությունը նորից լցվի ոգևորությամբ եւ քաղցրությամբ։
Դրա համար մենք պետք է հասկանանք այս երեսուն տարվա ամենակարեւոր պատմական դասը։ Անկախությունը նշանակում է համընդհանուր պատասխանատվություն մեր երկրի ապագայի հանդեպ, առաջին հերթին պետությունը ի շահ ազգային բարօրության կառավարելու ունակ ղեկավարներ ընտրելու կարողություն։ Այնքան ժամանակ, քանի դեռ մեր ազգը չի տիրապետելու այս արվեստին, անկախության քաղցրությունը չենք վայելելու։ Բայց ես հույս ունեմ, որ ազգային հասունության երջանիկ այդ օրը առջեւում է։
Իսկ նրանց համար, ովքեր համարում են, որ անկախությունը չի նվաճվել, այլ ուղղակի ընկել է մեր գլխներին, կցում եմ նաեւ երկու տարի առաջ անկախության տոնի կապակցությամբ արված գրառումը։
