Ինչպես տեղեկացրել ենք, այսօր Եռաբլուրում վարչապետ Նիկոլ Փաշինյանի այցելության ժամանակ լրագրողներին թույլ չտվեցին տեղաշարժվել ու լուսաբանել: ԶԼՄ-ների համար արգելապատնեշներ էին ստեղծել ու ոստիկաններն արգելում էին առաջանալ անգամ զոհերի շիրիմների մոտ:
Այնուամենայնիվ, հեռվից լսվում էր ողբացող մայրերի լացի ձայնը: Մի մայր Փաշինյանի այցի ժամանակ աղեկտուր կանչում էր. «Նիկոլի համար պայքար էիր մղում, որ Նիկոլն ընտրվեր, տեսա՞ր էդ պայքարի վերջն ինչ եղավ, բալա ջան, բալա ջան, արեւս, լույսս, հավատս»:
Կարդացեք նաև
Վարչապետը դեռ Եռաբլուրում էր, մի սեւազգեստ կին որդու շիրիմին այցելելուց հետո գնում էր տուն: Ինչպես հետո պարզվեց՝ Զաքար Ավանեսյանի մայրն էր: Հարցրեցինք՝ հանդիպե՞ց վարչապետի հետ, նա պատասխանեց, որ ոչ, չի տեսել. «Մեր երեխեքը գնացել, հայրենիք են պաշտպանել, այսօր էլ ունենք լավ տղաներ, որ էլի կպաշտպանեն: Ես խաղաղություն եմ ցանկանում, մեր ջահելներին ուժ ու եռանդ, որ մեր հայրենիքը ամուր ձեռքերով պաշտպանեն»:
Հարցին՝ ձեզ թողեցի՞ն ազատ տեղաշարժվել Եռաբլուրում՝ սեւազգեստ մայրը զարմացավ. «Իսկ ինչո՞ւ պետք է չշարժվեինք, ես հանցագործ չեմ: Իմ տղան հերոս է եղել, Մարտական խաչ ունի, եղել է Վլադիմիր Բալայանի, Լեոնիդ Ազգալդյանի հետ, նույն ամսում էլ զոհվել է»:
Նա ասաց, որ երեկոյան Հանրապետության հրապարակ չի գնալու՝ զոհերի հիշատակին նվիրված միջոցառումը: Հարցին՝ կո՞ղմ էիք, որ գունագեղ միջոցառում լիներ՝ նա պատասխանեց. «Ես կողմ չեմ, որովհետեւ մեր մայրերը սգի մեջ են, տարին չի լրացել մեր ջահելների, շատ վշտալի է»:
Հռիփսիմե ՋԵԲԵՋՅԱՆ
