«Արդեն երկու ամիս է անցել, ինչ Ալիեւն ասել է, որ ՀՀ-ն անկախ պետություն չէ։ Այ տղա Նիկոլ, որ Ալիեւին չես հակադարձել, ի՞նչ իրավունք ունես անկախության տոն նշելու»,-«Հայելի» մամուլի ակումբում լրագրողների հետ հանդիպմանն այսօր հայտարարեց ԱԺ նախկին պատգամավոր Գեւորգ Պետրոսյանը։ «Բա մի հատ վեր կենայիր ասեիր՝ այ Ալիեւ, անկախը դուք չեք․․․ բա մի հատ հակադարձեիր․․․թշնամի պետության ղեկավարն ասում է, թե դու անկախ չես, իսկ դու գունագեղ տոնակատարություն ես անում»,-Նիկոլ Փաշինյանին դիմեց Գեւորգ Պետրոսյանը։
Նրա խոսքով՝ որեւէ մեկը չի առաջարկում, որ սեպտեմբերի 21-ը մոռանանք որպես անկախության տոն, բայց այսօրվա իրականության մեջ այն գունագեղ նշելն է անընդունելի․ «Անդուր եւ զզվելի են այն պաշտոնյաները, որոնք առանց գետինը մտնելու՝ կառավարության նիստին կանգնած են դիմավորում Նիկոլին։ Նրա ո՞ր արածի համար եք ոտքի կանգնում։ Նրան անգամ պպզած չի կարելի դիմավորել։ Շատ-շատ դիվանին պառկած գիլաս ուտելիս լինես, կուտը շպրտես․․․»։
Գեւորգ Պետրոսյանի խոսքով՝ Նիկոլ Փաշինյանն այս տոնակատարությունն անում է զուտ նրա համար, որ ընդունելի լինի ժողովրդի աչքին, որ ասեն՝ չնայած պատերազմին, ինքը դեռ պաշտելի կերպար է։
Կարդացեք նաև
Անդրադառնալով Նիկոլ Փաշինյանի այն հայտարարությանը, թե ադրբեջանցիները Որոտանի հատվածում են սովետական քարտեզների համաձայն՝ Գեւորգ Պետրոսյանը նշեց․ «Էլ չգիտեն ոնց հիմնավորեն ու հիմա էլ ասում են, թե դա ադրբեջանական տարածք է։ Նման արտահայտությունները կօգտագործեն մեր թշնամիները։ Նման արտահայտությունները ենթադրում են, որ մենք ենք օկուպանտ, այսինքն՝ այսքան ժամանակ Գորիս-Կապան ավտոճանապարհը օկուպացրած ենք պահել»։
Լուիզա ՍՈՒՔԻԱՍՅԱՆ
