Երեւանում այսօր ընթացող «Հայ-ռուսական տնտեսական համագործակցություն․ հեռանկարային նախագծեր» խորագրով «Armenian Business Forum»-ի ժամանակ փոխվարչապետ Մհեր Գրիգորյանը լրագրողների հետ ճեպազրույցում անդրադառնալով տարածաշրջանում ճանապարհների ապաշրջափակմանն ու դրա ազդեցությանը տնտեսության վրա, ասաց, որ այս պահին կանխատեսել ճշգրիտ հաշվարկներ եւ ծավալների աճ դժվար կլինի, որովհետեւ կան երկու հանգամանքներ, որոնք դեռեւս հետազոտման կարիք ունեն:
Մհեր Գրիգորյան
Մհեր Գրիգորյանի ներկայացմամբ․«Առաջին հանգամանքն այն է, որ մենք երկար տարիներ եղել ենք սահմանափակումների տիրույթում, եւ այդ իմաստով, թե ինչ ազդեցություն կունենա ապաշրջափակումը, ակնհայտ է, որ դրական, բայց ծավալային իմաստով ինչ կլինի՝ պետք է շարունակենք հետազոտել»:
ՌԴ կառավարության փոխնախագահ Ալեքսեյ Օվերչուկն էլ հավելեց՝ եռակողմ հանձնաժողովը գործում է, վերջին 7-րդ հանդիպումը եղել է օգոստոսի կեսերին․ «Բոլոր կողմերը տրամադրված են տրանսպորտային եւ տնտեսական կապերի ապաշրջափակմանը: Իհարկե, քննարկվում է, թե ինչպես դա անել, բայց ակնհայտ է, որ ապաշրջափակումը, տրանսպորտային ուղիների վերականգնումը զգալիորեն նոր հնարավորություններ կարող է ստեղծել՝ ընդլայնելու եւ ավելացնելու ապրանքաշրջանառության ծավալները, այդ թվում՝ Հայաստանի եւ Ռուսաստանի միջեւ»:
Նելլի ԲԱԲԱՅԱՆ
