Կայացավ «Օրրանի» ամենամյա՝ արդեն 15-րդ բարեգործական ընթրիքը, որի ընթացքում ստացված հասույթն ուղղվում է «Օրրանի» շահառուներին՝ միայնակ ծերերին եւ խոցելի խմբերի երեխաներին:
Բարեգործական ընթրիքին մասնակցեցին «Օրրանի» հին ու նոր բարեկամներն ու գործընկեր կազմակերպությունները: Այս անգամ եւս կազմակերպվեց կենդանի աճուրդ եւ վիճակախաղ, ընդ որում, ինչպես նախորդ տարիներին, այս տարի եւս Վիվա-ՄՏՍ ընկերությունը զգալի ներդրում ունեցավ: Այն «Օրրանի» կողքին է 2006 թվականից:
Ինչպես լրագրողների հետ զրույցում նշեց «Օրրանի» հիմնադիրներից Արմինե Հովհաննիսյանը, արդեն 15-րդ տարի է, որ ընթրիքին ներկա են լինում ոչ միայն «Օրրանի» անհատ բարեկամները, այլեւ կորպորատիվ ընկերները: «Մենք փորձում ենք հաշվետվություն ներկայացնել այն մարդկանց, որոնք մեզ օգնել են այս տարիներին, նաեւ միջոցներ ենք հավաքում, որպեսզի կարողանանք մեր օգնությունը շարունակել: Կան կազմակերպություններ, որոնք արդեն 15 տարի միանում են մեզ, ե՛ւ ֆինանսական աջակցություն են ցուցաբերում, ե՛ւ կամավորություն անում: Նրանք բոլորը «Օրրանի» բարեկամներն են եւ ընտանիքի անդամները: Տիկին Հովհաննիսյանն ի թիվս այլոց՝ նշեց Վիվա-ՄՏՍ ընկերության եւ անձամբ գլխավոր տնօրեն Ռալֆ Յիրիկյանի, Կոկա կոլա ընկերության, HSBS-ի, Պեռնո Ռիկարի, Արմասի, Նինա Հովնանյանի անունները:
Կարդացեք նաև
Նա ասաց, որ արդեն «Օրրան» են հաճախում նաեւ արցախցի երեխաներ՝ Հադրութից, Շուշիից: Ընդ որում, «Օրրանի» ընթրիքին վաճառվեց նաեւ «Օրրանի» երեխաների ձեռքով նկարված կտավը, ինչպես Արցախյան կարպետը: Շուշեցի Կարինե Պետրոսյանը ներկայացրեց, թե ինչպես են փրկվել իր զավակները, ինչ հոգեբանական ծանր վիճակում են գտնվել տունը կորցնելուց հետո, եւ ինչպես է իրենց սատար կանգնել «Օրրանը»:
Ռալֆ Յիրիկյանի խոսքով, «Օրրանում» աշխատում է սիրով օժտված մի թիմ, որը չի կարող անտարբեր լինել փողոցում հանդիպող մուրացկանության եւ անտեսված միայնակ ծերերի հանդեպ, այժմ էլ նրանց ավելացել են պատերազմի պատճառով տեղահանվածները:
«Մենք կանգնել ենք «Օրրանի» կողքին, որովհետեւ իրենք ճիշտ գործ են անում եւ մենք հավատում ենք իրենց առաքելությանը»,-հավելեց նա:
Միջոցառմանը ելույթ ունեցավ նաեւ սիրված երգչուհի Սիբիլը: Նա ասաց, որ ճիշտ 5 տարի առաջ առաջին անգամ էր մասնակցում «Օրրանի» բարեգործական ընթրիքին: «Օրրանի» համահիմնադիր, «Ժառանգության» առաջնորդ Րաֆֆի Հովհաննիսյանը նշեց, որ միշտ տիկնոջ կողքին է, ասաց, որ շնորհակալ է բոլոր նվիրատուներին, որոնք մշտապես օգտակար են լինում «Օրրանին». «Կարեւորը ոչ միայն դրամական աջակցությունն է, այլեւ ոգին, որն անհրաժեշտ է այս դժվարին ժամանակներում, որը պետք է վերականգնվի, քանի որ մեր ազգը խնդիրներ ունի ոչ միայն տարածքային առումով, այլեւ ոգեղեն»:
Հավելենք, որ քանդակագործ Սպարտակ Գրիգորյանն իր քանդակներն էր նվիրել «Օրրանին», երգչուհի Սիբիլը՝ զարդեր «Թագուհի Զաբել» հավաքածուից, աջակցություն էին ցուցաբերել նաեւ «Ռոստելեկոմը», AGBA բանկը, «Գրանթ Թորոնթոնը», «Ինգո Արմենիան», Երեւանի գարեջուր ՓԲԸ-ն, Լեւոն Պարտակչյանը:
Երեկոն վարեցին Հայաստանում ՄԱԿ-ի մշտական ներկայացուցիչ Շոմբի Շարպը, Էռնա Էլիզբարյանը եւ Նարեկ Մարգարյանը:
Գոհար ՀԱԿՈԲՅԱՆ
