Շառլ Ազնավուրի հրապարակում «Հայկական շարժում» նախաձեռնության կազմակերպած բողոքի ակցիան շարունակվում է: Այն Անկախության տոնի առթիվ իշխանությունների կազմակերպած գունագեղ տոնակատարության դեմ է:
Ոստիկանները մոտ երկու տասնյակ քաղաքացիների բերման ենթարկեցին ցույցի վայրից: ԲՀԿ նախկին պատգամավոր Գեւորգ Պետրոսյանը, որը ներկա էր ցույցին, լրագրողների հետ զրույցում ոչ իրավաչափ որակեց ոստիկանության գործողությունները: Նա ասաց, որ ցուցարարները խաղաղ ակցիա էին անում՝ այսպես կոչված Անկախության տոնի գունագեղ դրսեւորումների դեմ եւ դա արժանանում է ոստիկանության ոչ համաչափ վերաբերմունքին. «Ոստիկանությունը միանգամից ձերբակալում է: Սա ժողովրդին վախի մեջ պահելու փորձ է: Հիմա ես այստեղ կանգնած եմ, ոստիկանությունն ո՞վ է, որ գա մեկը ինձ կպնի: Հիմա քաղաքացին ինքնաբուխ հավաք է լինելու, ոստիկանությունը զգուշացնում է, որ ձերբակալելու է: Ոստիկանությունը վերազանցում է իր իրավասությունները»:
Գեւորգ Պետրոսյանն ասաց, որ այս ցույցի պատասխանատուն ողջ ժողովուրդն է, որդեկորույս ծնողներն են, սա ինքնաբուխ հավաք է. «Ոստիկանները կանանց, տարեցներին ծեծելով տանում են, այդքան դուխով տղերք են, թող գնան Կապան-Գորիսի ճանապարհին, երբ թուրքը դանակով խազում է հայի ավտոբուսն ու հայհոյում երեխեքին, այդ սուտի լավ տղերքը թող գնան այնտեղ պայքարեն: Ինչի՞ են եկել Երեւանի կենտրոնում իրենց լավ տղու տեղ դրել: Այսօր մենք չունենք ոստիկանություն, որը ծառայում է ՀՀ-ին, ունենք ոստիկանություն, որը ծառայում է մեկ անձի»:
Ըստ Գեւորգ Պետրոսյանի, Նիկոլ Փաշինյանը այս ամենով մեկ նպատակ ունի, ուզում է աշխարհին ցույց տալ, որ ինքը դեռ սիրված, հարգված ղեկավար է:
Կարդացեք նաև
Հռիփսիմե ՋԵԲԵՋՅԱՆ
