«Էյվազլիի հատվածում ադրբեջանական ուժերը գործողություններ են իրականացնում, որոնք չեն տեղավորվում սահմանային խնդիրների տրամաբանության մեջ։ Մասնավորապես, գումար են վերցնում իրանական մեքենաներից։ Դա մաքսային գործողություն է, թե ապօրինի գործողություն։ Դա չի վերաբերում Զանգեզուրից դեպի ՀՀ ճանապարհին»,-խորհրդարանում լրագրողների հետ ճեպազրույցում այսօր հայտարարեց «Քաղաքացիական պայմանագիր» խմբակցության պատգամավոր, ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանը։
Նա նշեց․ «Այդ հատվածը շրջանցող ճանապարհի շինարարական աշխատանքներն ընթանում են։ Բարդություններ կան, բայց Կապանից Գորիս հատվածը շահագործվում է, այս պահին հերթեր ու լարվածություն չկա, բայց դա չի նշանակում, որ ճանապարհի խնդիրը լուծված է։ Եթե ժամանակին այլընտրանքային ճանապարհների խնդիրը լուծած լինեինք․․․Ադրբեջանական կողմը լարվածություններ կառաջացնի։ Կարեւորը, որ դա չբերի լարվածության այլ բնույթի»։
Կարդացեք նաև
Անդրանիկ Քոչարյանի բնորոշմամբ․ «Այլընտրանքը հանգուցալուծման քայլերից է, որն ադրբեջանական կողմի գործողությունները դարձնում է անիմաստ։ Ադրբեջանի ոստիկանության գործողությունները միտված են իրանական կողմին, բայց ես չեմ ուզում դա քննարկել։ Իրենց տնօրինման տակ գտնվող ճանապարհահատվածում նրանք գումար են պահանջում։ Էյվազլիի այդ հատվածում գործողությունների տրամաբանությունը խնդիր է առաջացնելու Ադրբեջանի եւ Իրանի միջեւ»։
Անդրադառնալով վարչապետ Նիկոլ Փաշինյանի վկայակոչած այն հանգամանքին, որ ադրբեջանցիները Որոտանի հատվածում են տեղակայված սովետական քարտեզների եւ 2010թ․ ընդունված վարչատարածքային բաժանման մասին օրենքի համաձայն՝ Անդրանիկ Քոչարյանը հարցադրում արեց․ «Իսկ ի՞նչ քարտեզ լիներ, Տիգրան Մեծի ժամանակվա՞։ Երբ խոսում ենք սահմանազատման մասին, ճշտումների մեջ պետք է մտնենք։ Իհարկե, մենք մեր շահերը պետք է պահպանենք։ Տարիների ընթացք է լինելու, տասնամյակներ են անցնելու»։
Լուիզա ՍՈՒՔԻԱՍՅԱՆ
