«Տարածաշրջանային հաղորդակցությունների ապաշրջափակումը նշանակում է, որ այն պետք է տեղի ունենա բոլոր հնարավոր ուղղություններով։ Ամեն բան պետք է տեղի ունենա սահմանապահ, մաքսային ռեժիմների գործառնության պարագայում, օրենսդրական բազայի հիման վրա»,-այսօր այս մասին լրագրողների հետ ճեպազրույցում ասաց փոխվարչապետ Մհեր Գրիգորյանը, որը մասնակցում էր Մրցակցության պաշտպանության հանձնաժողովի 20-ամյակին նվիրված միջոցառմանը։
Մհեր Գրիգորյանի խոսքով՝ տարածաշրջանում ենթակառուցվածքների ապաշրջափակման գործընթացում հնարավոր լուծումը երկաթուղու մասով ավելի տեսանելի է, իսկ ավտոճանապարհների մասով դեռեւս աշխատանք կա անելու․ «Տարածաշրջանային հաղորդակցությունների ապաշրջափակումը նշանակում է, որ այն պետք է տեղի ունենա բոլոր հնարավոր ուղղություններով։ Ամեն բան պետք է տեղի ունենա սահմանապահ, մաքսային ռեժիմների գործառնության պարագայում, օրենսդրական բազայի հիման վրա»։
Անդրադառնալով Սյունիքի մարզի Գորիս-Կապան ճանապարհահատվածին, Մհեր Գրիգորյանն ասաց՝ եթե խնդիրը չկարգավորվի, ապա այն մեր տնտեսության վրա բացասական ազդեցություն կունենա․ «Բայց ես հույս ունեմ, որ հարցը կկարգավորվի։ Եթե տրվելու է այլընտրանքային ենթակառուցվածքային լուծում, ապա դա շատ լավ լուծում է, կհավասարակշռի իրավիճակը։ Ես նկատի ունեմ Տաթեւի ճանապարհը։ Ենթակառուցվածքային, համապատասխան տեխնիկական լուծումը նշանակում է ռիսկերի մեղմում։ Բոլոր ճանապարհները պետք է լինեն, եւ դրանք պետք է լիարժեք գործեն։ Հայաստանի հարավում անհրաժեշտ է հնարավորինս շատ այլընտրանքային ճանապարհներ ստեղծել, որպեսզի Գորիս-Կապան մայրուղուց կախվածությունը կնվազի»:
Ինչ վերաբերում է ՌԴ ԱԳՆ պաշտոնական ներկայացուցիչ Մարիա Զախարովայի՝ սահմանազատման մասին հայտարարությանը, ապա պարոն Գրիգորյանն ասաց․ «Այդտեղ որոշակի գործընթաց պետք է սկսել»։
Կարդացեք նաև
Նելլի ԲԱԲԱՅԱՆ
