«Իշխանական քարոզչամեքենան երեկ արշավ սկսեց ընդդեմ Սերժ Սարգսյանի՝ փորձելով ասել, թե ապրիլյան պատերազմի հաջորդ օրը նա գտնվել է Բադեն-Բադենում։ Դա շատ արագ հերքվեց հստակ ապացույցներով։ Նախագահն այդ ժամանակ կարեւոր հանդիպումներ էր ունենում»,-խորհրդարանական ճեպազրույցների ժամանակ այսօր հայտարարեց «Պատիվ ունեմ» խմբակցության պատգամավոր, ՀՀԿ երիտասարդական կառույցի ղեկավար Հայկ Մամիջանյանը։
Նրա խոսքով․ «Երբ այդ արշավը սկսվեց, մեր մտքով առաջինն անցավ այն, որ դա Խաչատուր Սուքիասյանի՝ դատարանում սպասվելիք պարտությունը մեղմելուն է ուղղված։ Նա ասել էր, թե երրորդ նախագահը խաղատուն է գնացել։ Հաշվի առնելով նաեւ այն փաստը, որ նրա՝ նախկինում տեքստեր գրող, դեղին մամուլով հերքումներ գրողը հիմա ԱԺ նախագահի պաշտոն է զբաղեցնում, հավանաբար, ժամանակ էր պետք շահել, որպեսզի օլիգարխը պարտության տեքստը հասցնի պատրաստել։ Հետո «ֆեյսբուքյան» «ֆեյքից» էլ ավելի «ֆեյք» փորձագետներն ու քաղաքական գործիչները միացան արշավին, եւ պարզ էր, որ եղած խնդիրներից ուշադրությունը շեղելու համար էր այդ արշավը։ Օրվա ավարտին արշավին միացան նիկոլական քարոզչամեքենայի ԶԼՄ-ները, որոնցից ակնկալում եմ, որ հավասարապես կլուսաբանեն հերքումը»։
Հայկ Մամիջանյանը նշեց․ «Այս ամենից կասկածում ենք, որ հերթական հակահայկական կապիտուլյացիոն փաստաթուղթ կամ պայմանավորվածություն է սպասվում։ Այդ արշավի ճարտարապետը Դանիել Իոաննիսյանն է։ Խորհուրդ կտամ հետաքննել, թե ինչպես ստացվեց, որ վարչապետի պաշտոնը զբաղեցնող անձը երկու շքեղ «Մերսեդես» գնեց իրեն սպասարկելու համար կամ ինչպես ստացվեց, որ Սերժ Սարգսյանի՝ պետությունից տրամադրված առանձնատունը Փաշինյանի համար բավարար չեղավ, եւ պետական միջոցներից ահռելի միջոցներ ծախսվեցին՝ դրա նորոգման համար։ Բայց պարոն Իոաննիսյանը հակված չէ իրականությունը գտնելու, այլ հակահայկական օրակարգն առաջ տանելու»։
Կարդացեք նաև
Հիշեցնենք, որ «Իրազեկ քաղաքացիների միավորում» հ/կ ծրագրերի համակարգող Դանիել Իոաննիսյանը Սերժ Սարգսյանի փաստաբանին ուղղված գրառում էր արել։
Լուիզա ՍՈՒՔԻԱՍՅԱՆ
