Ադրբեջանը մտադիր է Հայաստանի դեմ հակընդդեմ հայց ներկայացնել ՄԱԿ-ի Արդարադատության միջազգային դատարան՝՝ Խտրականության բոլոր ձևերի վերացման միջազգային կոնվենցիայի խախտման հիմքով: Այս մասին հայտնել է Ադրբեջանի ԱԳՆ պաշտոնական ներկայացուցիչ Լեյլա Աբդուլլաևան:
«Կցանկանայի նշել, որ Հայաստանի կողմից մեր տարածքների մի մասի անօրինական օկուպացայի ավարտից հետո փութաջանորեն հավաքվել և փաստաթղթավորվել են ադրբեջանցիների նկատմամբ մարդու իրավունքների կոպիտ խախտումների դեպքեր: Այդտեղ ներառված են ադրբեջանցիների բռնի արտաքսման, դաժան վերաբերմունքի, խոշտանգումների, էթնիկ պատկանելության հիմքով սպանությունների դեպքեր»,- ասել է Աբդուլլաևան:
Նրա խոսքով՝ Հայաստանի կողմից հսկայական տարածքների ականապատումը և այն, որ Հայաստանը հրաժարվում է տրամադրել ականապատ դաշտերի քարտեզները, «անհնար է դարձնում հարյուր հազարավոր հարկադիր տեղահանվածների վերադարձն իրենց հայրենի վայրեր»:
«Մենք կապահովենք արդարությունը միջազգային իրավունքի շրջանում»,- ասել է Աբդուլլաևան:
Կարդացեք նաև
Երեկ հաղորդել էինք, որ Հայաստանի Հանրապետությունը գանգատ է ներկայացրել ՄԱԿ-ի Արդարադատության միջազգային դատարան ընդդեմ Ադրբեջանի՝ Ռասսայական խտրականության բոլոր ձևերի վերացման միջազգային կոնվենցիայի խախտման հիմքով:
Միաժամանակ Հայաստանը խնդրել է դատարանին կիրառել մի շարք հրատապ միջոցներ՝ այդ թվում ռազմավարի պուրակի փակումը և ռազմագերիներին ու պահվող քաղաքացիական անձանց վերադարձը:
Պատրաստեց Վիկտորյա ԱՆԴՐԵԱՍՅԱՆԸ
