ՔՊ-ականները շարունակ խոսում են բանակում թալանի մասին: ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանն ասում է, որ գեներալների առանձնատների ամեն քարի մեջ մի զինվորի ճակատագիր ու արյուն կա: Ու պատերազմում մեր պարտության մասին խոսելիս մատնացույց են անում հենց բանակի թալանը:
Այսօր Aravot.am-ը այս առնչությամբ խոսեց ՔՊ խմբակցության պատգամավոր, Ռոբերտ Քոչարյանի օրոք ՀՀ Պաշտպանության նախարարության թիկունքի վարչության պետ աշխատած, Սերժ Սարգսյանի վարչապետության օրոք պաշտպանության՝ թիկունքի գծով փոխնախարար աշխատած Գագիկ Մելքոնյանի հետ՝ պարզելու՝ բանակում նախկինում թալան եղե՞լ է, թե՞ չի եղել:
Կարդացեք նաև
Գագիկ Մելքոնյանը պատասխանեց. «Այդ թալանը այն թալանն է, որ ամեն մարդ քո դեմը չի թալանում, կամ դու տեսնում ես՝ թալանն արե՞ց, թե՞ չարեց: Ամեն մարդ կարողացել է ինչ-որ ձեւով ինչ-որ մի բան անել, գողանալ, ամեն մարդ ինչ-որ մի բան գողացել է: Վերջը գողության արդյունքն ի՞նչ է եղել՝ մենք չունեցանք նորմալ սպառազինություն: Վերջին տարիներին ուղղակի բանակն աչքաթող, բարձիթողի վիճակում մնաց: Արդեն 20 տարի ես լսում եմ, Ադրբեջանի նախագահն անընդհատ ասում է նույն բանը՝ մենք պետք է կռվով մեր հողերը հետ վերցնենք, պատերազմելու ենք: Ու այս 20 տարիների ընթացքում մենք անընդհատ լսում ենք ու ասում ենք՝ թող փորձեն: Դրան հակառակ, երբ որ լսում ենք, որ ՌԴ-ն 5 մլրդ-ի տեխնիկա, սպառազինություն, Պակիստանը, Չեխիան, Իսրայելը՝ այսքան միլիարդի առան, մենք այս ամեն ինչը լսում ենք ու հետեւություն չարեցինք դրանից: Բա ինչի՞ չարեցինք: Մենք կարող էինք չէ՞ ամեն տարի համապատասխան սպառազինություն ձեռք բերել: Եթե իրենք ունեին ԱԹՍ-ներ, մենք դրա հակառակ տեխնիկան պիտի ունենայինք ու հակաօդային պաշտպանության միջոցները շատացնեինք: Նույնիսկ մեր մտքով չի էլ անցել, որ ԱԹՍ-ներ առնենք: Մի անգամ այցելության ժամանակ երբ որ մենք գտնվում էինք Պարսկաստանում, իրենք մեզ տարան ցույց տվեցին ԱԹՍ-ների նմուշները, մենք պայմանավորվեցինք, թե ինչ գնով պիտի տային այդ ԱԹՍ-ները՝ այն գնով, ինչ իրենք առնում էին իրենց բանակի համար: 2002 թվականն էր, մենք գցեցինք ականջի հետեւ ու այդ ԱԹՍ-ները ձեռք չբերեցինք: Մենք քնեցինք: Երբ որ մենք առաջին, երկրորդ, երրորդ պաշտպանական գծեր պետք է ունենայինք բետոնապատ, ոչ մի տեսակի բայրաքթար, բան, ինչքան էլ խփեր, մեր բլինդաժները կմնային»:
Դիտարկմանը, որ դրա փոխարեն մենք անվադողերով ու պահածոների տուփերով էինք մեր դիրքերը պաշտպանում՝ Գագիկ Մելքոնյանն արձագանքեց. «Այդ հարցը պիտի տաս այդ մարդկանց, ասես՝ ինչո՞ւ չունեինք առաջին գիծ, կահավորված երկրորդ գիծ, երրորդ գիծ: Ասենք, պատերազմ էր, մենք տեսանք, եթե առաջին գիծը հետ է եկել, արդեն երկրորդ գիծը պիտի պատրաստ լիներ պաշտպանվելու: Արդեն երրորդ գծում մենք պիտի հակահարձակում կազմակերպեինք: Բայց չեղավ, որովհետեւ չկային այդ պաշտպանական միջոցները: Չկար ոչ մի բան: Երբ որ հիմա խոսում են արդեն, երբ որ հանձնված է արդեն առաջին գիծը, ասենք, Օմարի կողմից, Աղդամ, Հադրութ եւ մնացած տարածքները, հիմա իրենք խոսում են, որ այդ գծերը եղել են: Բայց հիմա, որ Մարտունին կա հլը, Մարտակերտը կա, գնանք տեսնենք՝ քանի՞ գիծ է կահավորված, քանի՞ պաշտպանական շրջան, քանի՞ գիծ է պատրաստ, որ կարողանա մարտնչի: Ամեն մեկը ինչ խոսում է, այդ խոսացողներին վերցրեք, ասեք՝ գնանք Մարտունի, տեսնենք քանի՞ գիծ է պատրաստ»:
Հարցին՝ բա որ այդքան անպատրաստ էինք, ինչո՞ւ էր Դավիթ Տոնոյանն ասում՝ նոր պատերազմ, նոր տարածքներ՝ Գագիկ Մելքոնյանը պատասխանեց. «Դե հիմա դա հարցրեք Դավիթ Տոնոյանին: Դավիթ Տոնոյանը քանի՞ անգամ է գնացել առաջին գիծ, երկրորդ, երրորդը տեսել է, որ այդ գծերը կան: Թող իրենք մի հատ այդ մասին խոսեն: Նույնը այն ժամանակ է եղել՝ միլիարդներ ենք մենք ծախսել պաշտպանության գծերի հետ կապված: Հիմա խոսալով չի, հիմա ապացուցելով է: Հիմա մենք ունե՞նք այդ շրջանները, գնանք տենանք ինչ է արվել այն ժամանակ: Թող խոսեն, պատասխան տան»:
Հռիփսիմե ՋԵԲԵՋՅԱՆ
