Վերաքննիչ դատարանում, դատավոր Նարինե Հովակիմյանի նախագահությամբ, այսօր շարունակվում էր սահմանադրական կարգի ենթադրյալ տապալման գործի կարճման վերաբերյալ պաշտպանների և դատախազների բողոքի քննությունը:
Դատախազ Գեւորգ Բաղդասարյանը չանդրադարձավ ոչ Ռոբերտ Քոչարյանի եւ մյուսների պաշտպանների դիրքորոշմանը, ոչ թե իբրեւ լավություն, այլ ասաց, թե նրանց իրավաբանությունն րեն ծանոթ չէ: Դատախազ Գեւորգ Բաղդասարյանը չանդրադարձավ նաեւ տուժողի ներկայացուցիչ Սեդա Սաֆարյանի այն դիրքորոշմանը, որ ՍԴ որոշման հիման վրա քրեական հետապնդում դադարեցնելու կարգ նախատեսված չէ: Ավելին, Սեդա Սաֆարյանի բողոքի շատ դրվագներ դատախազի համար էլ անհասկանալի էին: Իսկ ինչ վերաբերվում է Սեդա Սաֆարյանի այն դիրքորոշմանը, որ դատախազները պետք է մեղադրանքը փոխեին, Գեւորգ Բաղդասարյանն ասաց՝ չի հասկանում, թե ի՞նչ ենթատեքստ կա այդ հայտարարության մեջ, քանի որ մինչ դատարանում հնչեցնելը՝ Սեդա Սաֆարյանն այն այլ տեղերում էլ է հնչեցրել եւ հավելեց, որ մեղադրանքի փոփոխության հնարավորություն չեն ունեցել, այլապես կանեին դա: Այդ հնարավորությունը չի եղել, քանզի դատարանում ապացույցների հետազոտման փուլ չի եղել, իսկ օրենքից դուրս կամ բացառություններով առաջնորդվել իրենք չեն պատրաստվում:
Դատախազ Պետրոս Պետրոսյանն էլ անդրադարձավ Ռոբերտ Քոչարյանի պաշտպան Հայկ Ալումյանի բողոքին՝ վերացնել իր պաշտպանյալի նկատմամբ կիրառված 2 միլիարդ դրամ գրավը կամ նվազեցնել դրա չափը: Պետրոս Պետրոսյանը պնդեց, որ Ռոբերտ Քոչարյանի խափանման միջոցը եւ գրավի չափը չփոխվեն։ Նրա հիմնավորմամբ, ավելի վաղ Վճռաբեկ դատարանը տվել էր բոլոր սպառիչ պատասխանները։ Պաշտպանության կողմի փաստարկները դատախազը համարում է չհիմնավորված։ Միեւնույն ժամանակ, նա համաձայնեց, որ գրավի սահմանված 2 մլրդ չափը գերազանցում է վնասի հատուցման սպասելի շեմը, բայց հարգելով Վճռաբեկ դատարանի որոշումը՝ գրավի չափը պետք է մնա անփոփոխ։
Հաշվի առնելով, որ սեպտեմբերի 18-28-ը փաստաբան Կարեն Մեժլումյանը արձակուրդում է լինելու, իսկ դատավորներն իրենք մինչեւ հոկտեմբերի առաջին տասնօրյակի վերջը վերապատրաստման դասընթացների են, նախագահող դատավոր Նարինե Հովակիմյանը հաջորդ նիստը նշանակեց հոկտեմբերի 15-ին, ժամը 17-ին։
Կարդացեք նաև
Նելլի ԳՐԻԳՈՐՅԱՆ
