Վերաքննիչ դատարանում՝ դատավոր Նարինե Հովակիմյանի նախագահությամբ, շարունակում է սահմանադրական կարգի ենթադրյալ տապալման գործի կարճման վերաբերյալ պաշտպանների և դատախազների բողոքի քննությունը:
Տուժողի շահերի ներկայացուցիչ Սեդա Սաֆարյանին դատավորը նկատողություն հայտարարեց: Վերջինիս դուր չեկավ պաշտպան Միհրան Պողոսյանի ելույթը եւ նա տեղից սկսեց դիտողություն անել պաշտպանին: Պաշտպանը մանրամասն հիմնավորում էր, թե ինչո՞ւ է անհասկանալի դատախազների բողոքի այն դրույթը, թե առաջին ատյանի դատարանի որոշումը՝ 300.1 հոդվածի հակասահմանադրական լինելու պատճառով Ռոբերտ Քոչարյանի եւ մյուսների նկատմամբ քրեական հետապնդումը դադարեցնել եւ գործը կարճել, ոչ իրավաչափ, քանի որ տվյալ նիստին Յուրի Խաչատուրովը, Սեյրան Օհանյանը չեն մասնակցել: Սեդա Սաֆարյանը գտնում է, որ պաշտպանի ներկայացրածը քննվող հարցի հետ առնչություն չունի:
«Իրան իրավաբանի տեղ է դրել, մեզ էլ… »,- ասաց Սեդա Սաֆարյանը, ապա բանավեճի մեջ մտավ դատարանի հետ՝ դատարանին մեղադրելով, թե միայն տուժողի նկատմամբ է կարողանում սանկցիա կիրառել. «Կարողանայիք, էս օրին կլինե՞ր էս գործը»: Դատավորը նախատեց Սեդա Սաֆարյանին՝ հիշեցնելով, որ երբ իր ելույթի ժամանակ ինքը մեղադրական եզրակացությունն էր ընթերցում, որը նույնպես գործի հետ կապ չուներ, պաշտպանները նրան չէին ընդհատում եւ պահանջեց հարգալից լինել դատարանի նկատմամբ:
Կարդացեք նաև
Իսկ պաշտպան Հովհաննես Խուդոյանի ելույթի ժամանակ Սեդա Սաֆարյանը հեռացավ դատարանի դահլիճից՝ հայտարարելով. «Այստեղ իրավաբանության հետ կապ չունեցող խնդիրներ են քննարկվում, մարտի 1-ի գործի հետ կապ չունեցող, իմաստ չունի»: Նա ասաց, որ պաշտպանների բողոքի հետ կապված էլ չի ցանկանում դիրքորոշում հայտնել:
Հիշեցնենք, պաշտպանները միջնորդություն էին ներկայացրել՝ վերացնել Ռոբերտ Քոչարյանի նկատմամբ կիրառված 2 միլիարդ դրամ գրավը կամ նվազեցնել դրա չափը:
Նելլի ԳՐԻԳՈՐՅԱՆ
