82-ամյա Թամարա Արմենակի Նազարյանին, քանի դեռ Արցախում չէ, շատերն են տեսել Երեւանում: Լուսանկարից կհիշեք նրան:
1992 թվականից նա աշխատել է ԼՂՀ Ասկերանի շրջանի Խրամութի դպրոցներում, դասավանդել է մաթեմատիկա: 1992-1994 թվականներին Արանզամինի կամավորական ջոկատի եւ Ասկերանի պաշտպանական շրջանի ստորաբաժանումների կազմերում մասնակցել է Ասկերանի (Արանզամին, Նախիջեւանիկ), Աղդամի (Աղդամ, Շելլի, Աթափլու եւ այլն) շրջանների ինքնապաշտպանական եւ ազատագրական մարտերին։ Վարազաթումբը կարեւոր ռազմավարական նշանակություն ունեցող տարածք է: 1994 թվականի փետրվարի 11-12-ին ռազմական գործողություններն ընթացել են գլխավորապես այս տարածքում։ Փետրվարի 12-ին հայկական ուժերին հաջողվեց վերահսկողություն սահմանել Վարազաթմբի բլուրի շրջակայքում, իսկ 2016 թվականի ապրիլին տեղի ունեցած արցախա-ադրբեջանական քառօրյա պատերազմի ընթացքում այն օկուպացվել է Ադրբեջանի զինված ուժերի կողմից: Թամարա Նազարյանը ստացել էր կոնտուզիա, երկրորդ խմբի հաշմանդամ է, ունի մարմնին բազմաթիվ բեկորներ…
Ստացել է ցնցակաթված, վիրավորվել ոտքից, ձեռնամարտի ժամանակ 1991թ. հոկտեմբերի 6-ին ձախ քունքից ստացել է վնասվածք:
Այս օրերին Թամարա Նազարյանը մանկավարժ քրոջ՝ խնամակալ Նադյայի տանն է: Նադյան էլ դպրոցում էր աշխատում, աշխատանք այլեւս չունի: Թամարան, քանի որ գրանցվել է քրոջ՝ Վեդիի հինգերորդ հարկում գտնվող բնակարանում, դիմել էր Նիկոլ Փաշինյանին, որպեսզի Վեդիում իրենց ընտանեկան հողակտորի վրա հատկացնեն տնակ՝ դոմիկ, մահվանից հետո վերադարձնելու պայմանով. դժվարանում է հինգերորդ հարկ բարձրանալ-իջնել… Վեդիի քաղաքապետարանը մերժել էր նրա խնդրանքը. «Քաղաքապետարանը միջոցներ չունի ձեռք բերելու» պատճառաբանությամբ:
Կարդացեք նաև
«Առավոտին» երեկ տիկին Նադյան հայտնեց, որ պաշտպանության նախարարությունից՝ ԶԱ ՍՊ եւ ՎՀ գլխավոր վարչության պետ Ա. Ավետիսյանից ստացել է հետեւյալ պատասխանը. «ՀՀ վարչապետին ուղղված դիմումը վերահասցեագրվել է ՀՀ պաշտպանության նախարարություն եւ վետերանների հարցերով գլխավոր վարչություն: Թամարա Արմենակի Նազարյանը, որպես 2-րդ խմբի զինհաշմանդամ, հաշվառված չէ ՀՀ ՊՆ համակարգի բնակարանային մակերեսի կարիքավորների հաշվառման հերթացուցակում:… Համայնքի ղեկավարը հաշվառման է վերցնում այն շահառուներին, ովքեր զինծառայողի՝ 1-ին կամ 2-րդ խմբի հաշմանդամության զինվորական կենսաթոշակի իրավունք ունեցող ճանաչվելու կամ զոհվելու (մահանալու) օրվա դրությամբ հաշվառված են տվյալ բնակավայրում, ընդ որում, Երեւան քաղաքում, առնվազն վերջին 10 տարում, իսկ այլ բնակավայրերում՝ առնվազն վերջին 5 տարում»:
Ռուզան ՄԻՆԱՍՅԱՆ
«Առավոտ» օրաթերթ
14.09.2021
