Ռազմական փորձագետ Դավիթ Ջամալյանը Նիկոլ Փաշինյանի՝ սեպտեմբերի 21-ին գունագեղ տոնակատարություն կազմակերպելու մասին հայտարարությունը ցինիզմ է համարում: «Դա ցինիզմ է, բայց՝ ցինիզմ, որն ունի շատ պրագմատիկ նպատակ: Բոլոր առումներով, նաեւ՝ բարոյահոգեբանական, սրանք պետք է լեգիտիմացնեն Արցախի կորուստն ու պարտությունը, մեր հայրենիքի, տարածքների նվիրաբերումը: Նրանք պետք է տպավորություն ստեղծեն, թե երկրում իբրեւ բնականոն հունով կյանքը ընթանում է, այլեւս չկա խնդիր, ինչ եղել՝ անցել է: Եվ նախապատրաստել երկիրը, հանրությանը՝ թուրքերի հետ ինտեգրվելու գաղափարին, ինչը իրենց ուղեղների մեջ ներմուծված է եղել տասնյակ տարիներ շարունակ…
Այլ հարց է, որ մազից կախված այս իշխանության հեռանկարները ոչ միայն մշուշոտ են, այլեւ նրանց համար ապագա չկա: Ցանկացած ֆորս մաժոր կարող է սրանց վերջը դնել: Եվ այդ ֆորս մաժորը մոտենում է: Իրենք վախեցած են: Իրենք շատ լավ հասկանում են, որ գալու է մի պահ, երբ իրենցից յուրաքանչյուրը փորձելու է ինչ-որ կամուրջներ նետել դեպի պետականակենտրոն ուժեր: Իրենք շատ լավ հասկանում են, որ իրենց պարագլուխը, որի համար այդ խառնամբոխը ոչ մի արժեք չունի, վերջին պահին թքելու է իրենց վրա: Եվ ես կարծում եմ, որ համապատասխան զարգացումների պարագայում այդ իշխող խմբակցությունը շատ հեշտ պառակտվելու է, որովհետեւ միավորող հոգեհարազատ գաղափարական որեւէ հենք չկա»,- ասաց ռազմական փորձագետը:
Աշոտ ՀԱԿՈԲՅԱՆ
