Երեւանում առաջիկայում կներդրվի էլեկտրոնային վճարման միասնական համակարգ, որը հնարավորություն կտա վճարել բանկային քարտով, սմարթֆոններով եւ այլ միջոցներով: Այսօր այս մասին ասաց Երեւանի քաղաքապետ Հայկ Մարությանը՝ ավագանու նիստում:
Նրա խոսքով. բոլոր զարգացած քաղաքներում ուղեւորը գիտի, որ տրանսպորտից օգտվելիս պետք է մոտը տոմս ունենա, մեր դեպքում ավելի հեշտ է՝ պետք է ընդամենը ունենալ 100-դրամանոց մետաղադրամ. «Իսկ էլեկտրոնային եղանակով վճարելու մեր սարքավորումները այսօր աշխարհում եղած ամենաառաջադեմն են լինելու: Այն ամենից, ինչից էլեկտրոնային տարբերակով հնարավոր է «գումար քաշել», բոլոր այդ տարբերակները աշխատելու են: Իսկ նոր, փոքր ավտոբուսներում միայն 100-դրամանոց մետաղադրամներով վճարելու պահանջը եւս անցումային փուլի առանձնահատկություններից է»։
Հայկ Մարությանը, պատասխանելով ավագանու անդամ Իզաբելլա Աբգարյանի հարցին, նշեց, որ Երեւանի համար նախատեսված 211 նոր ավտոբուսները հոկտեմբերի 10-ին կլինեն Փոթիի նավահանգստում։
«Եթե ամեն ինչ նախատեսված գրաֆիկով գնա, ավտոբուսները հոկտեմբերի 10-ին կլինեն Փոթիի նավահանգստում: Մինչեւ Երեւան հասնելու համար, հավանաբար, կպահանջվի շուրջ 10 օր»:
Կարդացեք նաև
Ըստ Հայկ Մարությանի, վերջնարդյունքում շուրջ 850 ավտոբուսով կներդրվի բրիտանական խորհրդատուի առաջարկած նոր տրանսպորտային ցանցը:
Լուսինե ԲՈՒԴԱՂՅԱՆ
